Kyrmen u Guardiola ba u Haaland un jop ïa ka khusnam Ballon d’Or 2023
Ka samoi ba sniew u Messi ka dei kaba seisohtam ïa kiwei-Guardiola
Etihad Stadium-Man City, Risaw 21: U manager jong ka klob Manchester City, u Pep Guardiola u la pynsngew ba u snar thep kol ka kynhun, u Erling Haaland u la dei ban khur ïa ka khusnam 2023 Ballon d’Or.
Haba phai sha u Haaland u la khyrwit haduh 52 kol naki 53 sien mih madan na ka Man City kaba la khylliap ïa ka samoi lehkai snem 2022-23 da lai tylli ki trophy.
U ne u rangïalehkai bar ri ka Norway u dei u wei napdeng ki 30 ngut ki player kiba la shah jied ban ïaknieh ïa ka khusnam Ballon d’Or ha ka 30 Risaw.
Na ka liang jong u Guardiola u la ong, “U Haaland u dei ban jop – Ho-oid. Ngi kum ka kynhun ngi la rah haduh lai tylli ki trophy bad u la pynkhih haduh 50 kol.”
U rangïalehkai jong ka klob Inter Miami, u Lionel Messi u dei u player ba ïeng pyrshah ïa u Haaland ha ka jingïaknieh ban poi kyrdan ba nyngkong na bynta kane ka khusnam jong ka phutbol.
Haba phai sha u Messi, u la khur haduh hynñiew sien ïa ka khusnam Ballon d’Or, u la long u la long u shabi ban btin lynti ïa ka Argentina sha ka burom jong ka World Cup 2022 ha ka por ba u dang dei u player jong ka klob Paris St-Germain.
Shuh shuh u Guardiola, u ba la ïoh bynta ban coach ïa u Messi ha ka por ba mabki arngut ki dang don bad ka Barcelona, u ngeit ba u ne u rangïalehkai ba 36 snem u dei hok ban ïoh la ka jong ka bynta.
“Ka Ballon d’Or ka dei ban long ha ki ar bynta. Kawei ïa u Messi, bad hadien phai pat sha kiwei ki player” la ong u Guardiola. “Ka samoi kaba sniew ïa u Messi ka dei kaba seisohtam ïa kiwei.”