Kyntu u CM ia ka HNLC ban wanphai biang sha ka miej jingïakren ïasuk

Shillong, Kyllalyngkot 15 : U Myntri Rangbah ka jylla u Conrad K Sangma mynta ka sngi Balang ula kyntu ïa ka kynhun kieng atiar Hynniewtrep National Liberation Council (HNLC) ba kan wanphai biang sha ka jingïakren ïasuk ban pynbeit ïa ki mat ki ban pynthikna ban don ka jingsuk jingshngaiñ kaba ïaineh slem ha ka jylla.
Haba iakren bad ki nongpathai khubor, u Conrad Sangma ula ong ba ka jingkhang jong ka sorkar ka long beit kaba plie na ka bynta ban ïakren ïasuk bad ka kynhun kieng atiar.
“Ngi ïawer ïa ka kynhun ban wan ïakren bad ngi dap da ka jingkmen ban plie lad biang ban pynïaid shakhmat ïa ka jingïakren kumba ngi lah leh ha ka por kaba la dep” la ong u Conrad haba kdew ïa ka jingïakren ïasuk ha ka wat kaba nyngkong kaba la long ha u snem 2023 bad ka HNLC.
Ula ong ba kiei kiei kim shym la lah shuh ban ïaid shakhmat hadien ba ka kynhun kieng atiar ka la rai ban weng noh ïalade na ka jingïakren ïasuk ha u Kyllalyngkot jong u snem ba la dep.
“Lada ngi kwah shisha ban ïaid shakhmat, ngi hap ban weng ïa kito ki jingeh bad ki jingtynjuh bad kane ka dei tang kata ka lynti ban lah ban pynbeit ïa kitei ki jingtynjuh da kaba ïakren bad ïatai bad ban wad ïa ki lad ki lynti. Kumta ngi kyntu ban peit ba ki don ki jingtynjuh, ki lah ban don ki bynta bad ki diengpynkiang kiba lah ban mih, kan dei kaba ju jia ha kino kino ki jingïakren ne jingïasyllok hynrei katei kam dei ban pynduh mynsiem noh ïa ngi, dei ban pynthikna ba kan pynlong ïa ngi kiba ïengskhem ban ong ba ngi kwah ïa ka jingsuk ka ban neh shi rta bad ngi kwah ba ïa kitei ki mat baroh dei ban shimkhia bad haba mih kano kano ka jingsngewkhia na ka liang ka jongki, ngi donkam ban ïa shong ban ïa pyrkhat katkum ka rukom treikam jong ka riti synshar ka ri, hapoh ka jingïakren bad ka MHA bad ka sorkar jylla bad ka kynhun ka jongki ngi dei ban ïaid shaphrang.
“Kane kadei ka jingkyrpad ka jong ngi, ngi kwah ban phah biang ïa ka khubor sa shisien ba ngi long kiba kloi ban ïakren bad to ngin ïa leit sha ka miej ban ïakren bad kino kino ki jingsngewkhia kiba don, kaba bha tam ban pynbeit ïa kitei ki jingsngewkhia kadei lyngba ka jingïakren” la ong u Myntri Rangbah.
Halor ka jingdawa ka HNLC ban map noh ïa ki kam bymman, u Myntri Rangbah ula ong, “ïa kane ka bynta la ïakren la bunsien. Na ka liang jong ka Sorkar India kala kdew ba kan ym lah ban pynbna noh ïa katei mynta hi, namar ba ki don katto katne ki case, ki aiñ, ki kyndon kiba la don lypa naduh ki por kiba la leit, kumta kala don pat ka lynti ban ïaid shakhmat”.
“Ngi ong ba ngin ïakren ïa katei ka bynta. Ki don katto katne ki kam bymman kiba la leh, ïa kaba ki kyndon aiñ kila don lypa na ka bynta ka jong ngi kum ka sorkar jylla. Ngim lah ban shu ong ba ïa baroh kiei kiei lah pynduh lut, ngim lah ban leh ïa kata, ka hap ban wan na ka sorkar India ban ïakren ïa kane hynrei lada phi kwah ban ïakren ïa katei, ngi hap ban ïa shong. Hynrei hashwa ba ngin ïa shong, phi lah pan ban map noh ïa ki kam bymman kiba la leh, kumno ngin sdang ïa ka jingïakren ka dei kaba nga kwah ban ong” la pynpaw u Conrad.
“Haba ngi ïatai bad ïakren, kumta kitei ki mat baroh kin sa mih bad lah ban ïakren ïa katei ka mat hynrei hashwa ban sdang ka jingïakren kumno la buh lypa ïa ki kyndon bad ïa ka sorkar India ba kan leh ïa katei ka long ka bym lah” ula ong.
Ula pynthikna ba ka sorkar kan pyrshang ïa kaba bha tam ban ïakren ïa katei ka mat bad ka sorkar India.
“Kadei kaei kaei kaba ngam lah ban ai ïa ka jingkular na ka liang jong ka sorkar India namar ba ka MHA ka dei ka tnad jong ka sorkar pdeng bad hap ban leh ïa katei ha ka kyrdan ka jong ka” la ong u Myntri Rangbah.