Shillong, Naitung 17: U MLA jong ka Seng BJP, u Bah Sanbor Shullai, u la kyntu ïa ka sorkar pdeng ba kan pyllait ïa ka Meghalaya na ka jingpyntreikam ïa ka Uniform Civil Code (UCC).
Ha ka shithi ba u la phah sha u Chairman jong ka Law Commission ka ri India, u Justice Ritu Raj Awasthi, u MLA ka South Shillong, u la ong ba ka jylla Meghalaya kadei ka jylla kaba kyrpang kaba ka kheiñ jait na ka kynthei bad ka jingpyntreikam ïa ka UCC ka lah ban ïatyngkhuh bad ka riti ka dustur jong kane ka jylla.
U la ong ruh ba ka sorkar pdeng ka la pynpaw ka jingjynsur mynsiem ha kaba pyntreikam ïa ka CAA ruh, da kaba pyllait na ka jingpyntreikam ïa ka ha ki jaka ba dei jong ki riewlum.
U la ong ba kino kino ki aiñ kiba wanrah ha ka ri kim dei ban ktah ïa ka jinglong kyrpang ki rit paid. U la ïathuh ruh ba ka Law Commission ka la pan jingmut na kiba bun ki liang ha kaba ïadei bad ka jingpyntreikam ïa ka UCC bad ka la ïoh bun bha ki jingai jingmut ha kaba ïadei bad kane ka aiñ kaba thmu ban pynlong tang kawei ka aiñ ha ri India ha kaba ïadei bad ka riti ka dustur.
