Shillong, Nohprah, 19: Ka Synjuk ki Nongsynshar Shnong Nongthymmai Pyllun, Shillong kaba la shong pyrkhat kam ha kine ki sngi ba ladep ka la rai ban kyntu ïa ka Khasi Hills Autonmous District Council (KHADC) ha kaba ïadei bad ka Delimitaion of MDC Constituency ban ap shuwa shipor bad ban ïa ïoh ban mir jingmut lang khnang ba kan long ka jingmyntoi ïa baroh lang.
“Katkum ka jingsngewthuh ba ka don ka jingthmu ban wanrah ïa ka jingphiah bad pynbun Constituency lyngba ka Review Committee on Sixth Schedule ka ban wanrah ha kane ka Dorbar Tlang jong ka Parliament, kumta ngi sngewdei ban da ïa pyrkhat bha ïa kane ka kam khnang ba kan ym wanrah ïa ki jingeh hadien habud,” ong u kyrwoh ba la phah da u President ka SNSNP u Bah Bantylli L. Narry.
“Ka Synjuk ka kyrshan tyngeh bad ai mynsiem ïa ka jingdawa ki ASHA ha kaba ïadei bad ka jingpynkiew ïa ka tulop jong ki. Ka kyntu ïa ka Sorkar ba kan kham pynkloi ïa kane ka kam namar ngi sngewthuh ïa ka jingkordor ka jingtrei jong ki,” la ong ka Synjuk.
Ka Synjuk ka la shim ruh ïa ka rai ban weng noh na ka jinglong dkhot na ka Synjuk ki Nongsynshar Shnong ka Bri U Hynniewtrep (SKNSBH) tad haduh da ïoh ïa ki nongkitkam ba pura bad kiba la ïoh ïa ka jingpynkupbor na ki Dorbar Shnong jong ki.
“Kumta ha kaba ïadei bad kane ka kam ka kyntu bad pynpaw sha ka sorkar ne kino kino ki bor synshar ba ha kano kano ka kam ba ka SKNSBH ka shim rai ka Synjuk kan ym lah ban pdiang khlem da ïoh ban ïa puson bad rai lang,” la ong ka Synjuk.
