Shillong, Jylliew 30: Ka Confederation of Meghalaya Social Organizations (CoMSO) ka la khot ïa baroh ki seng trai ri trai muluk, ki seng sain pyrthei, ki kyrtong kiba iakhun, ki seng tynrai, ki seng samla bad uwei pa uwei u nongshong shnong ba peitngor jong ka jylla Meghalaya ban ïashim bynta shitrhem ha kane ka jingpynkhreh kaba dang ïaid sha khmat jong Special Intensive Revision (SIR) jong ka electoral rolls, ka hok synshar paidbah bad ka sain hima sima jong ki trai ri trai muluk jong ka Jylla.
U Chairman ka CoMSO u Bah Roy Kupar Synrem u la ong ba ym dei ban khein ïa ka SIR kum ka jingleh elekshon kaba ju long man ka sngi hynrei kum ka kabu kaba duna bha ban pynthikna ba ki thup kyrteng thep vote kin dang lait na ki bym dei hok ne kiba artatien.
“Ka jinglong khuid jong ka thup nongthep vote ka dei ka nongrim jong ka synshar paidbah.Lada ka thup jong ki nongthep vote ka shah pynthut, ka jinglong hok hi jong ka synshar paidbah ka tlot noh,” u la ong.
U peit thuh ba ki seng trai ri trai muluk ki ju pynpaw ïa ki jingsngewkhia halor ka jingwan buhai shnong be-aiñ, ka jingkylla ha ka jingbun briew bad ka jinglah jong ki nongthep vote ki bym dei ki nongthep vote kiba shisha ban shem ïa ka lynti ban rung sha ki thup nongthep vote. Ka SIR, namarkata, ka ai ka lad kaba long katkum ka aiñ bad kaba shai ban pynshisha ïa ki kot ki sla jong ki nongthep vote, ban weng ïa ki nongthep vote kiba thok bad kiba la iap, ban pynbeit ïa ki jingbym ïahap bad ban pynthikna ba tang ki nongthep vote kiba dei hok katkum ka aiñ kin sah ha ka thup nongthep vote.
Ka CoMSO ka la kyrpad ïa man la kawei pa kawei ka Dorbar Shnong, ki Nokma, ki jaka pule tynrai, ki bor synshar shnong, ki nongïalam paidbah bad ki jaka thep vote ba kin long kiba husiar ha baroh shilynter ka jingpynshisha. Kum kito kiba tip bha ïa ki jaka jong ki, ki don ka bynta kaba kongsan ban ithuh ïa ki jingdawa kiba artatien, ki jingpynrung ba thok bad kiwei kiwei ki jingbym iahap lyngba ka rukom treikam aiñ katba ki pynthikna ruh ba ym don nongthep vote ba shisha jong ki trai ri trai muluk ki ban shah kyntait bakla.
Ka seng ka la kyntu ïa baroh ki seng sain pyrthei bad ki kyrtong ban mih sha khmat bad ban ïatreilang ban ïada ïa ka jinglong ba janai jong ki thup nongthep vote, da kaba pynksan ba kane ka mat ka iadei bad ka hok riti synshar jong uwei pa uwei u nongshong shnong trai ri ban ïa kano kano ka seng sain pyrthei.
“Kane ka dei ka jingkitkhlieh lang.Ka lawei ka shong ha ka jinglong thikna bad jingshaniah jong ki thup kyrteng thep vote.Uwei pa uwei u nongshong shnong uba dei hok u dei ban ïatreilang bad ki bor synshar bad ban long kiba husiar khnang ba ki thup kyrteng thep vote kin pynpaw shisha ïa ka jinglong nongjied ba shisha jong ka Meghalaya,” ong u Bah Synrem.
