Kyntu ka BJP ïa ka sorkar ban bishar bniah ïa ka jingktah ïa ka Mariang ha dewlynnong Lumpongdeng

Shillong, Ïaiong 16: U Bah Mariahom Kharkrang uba dei u nongatien ka Bharatiya Janata Party (BJP) ha ka sngi Palei, ula ong ba ki kynrum kynram halor ka tourism project ha dewlynnong Lumpongdeng ka iaid palat tang ïa ka jingsngewkhia halor ka mariang bad kyntu ïa ka Sorkar ba kan bishar bniah ïa ka jingktah ïa ka mariang, ban pynneh pynsah ïa ki jaka Sorkar bad pynthikna ba ki trai shnong ki ioh jingmyntoi na ka roi ka par.
Haba kren bad ki lad pathai khubor u Bah Kharkrang u la ong,”Ka kynrum kynram ba dang shen halor ka dewlynnong Lumpongdeng kala pynmih ïa katto katne ki jingsngew kiba iaid palat tang ïa ka jingsngewkhia halor ka mariang”.
“Haba phai sha ka sawdong sawkun ka mariang, ka Pung Umiam kam dei tang ba itynnad bha – ka dei kaba la long tynrai ha ka jinglong ka mariang bad ka kolshor ka Meghalaya.Bad ka dewlynnong Lumpongdeng ka dei kaba la khein kum ka jaka ba shongdor bha bad kaba don jingma na ki jingshah pynjulor”.
Haba pynpaw ba ka jingpynroi ïa ki kam jngohkai ka long kaba donkam bha mynta, ula maham pat “Ka Sorkar ka dei ban da pyrkhat bha ïa ka jingshah ktah ka mariang hashuwa ban ai jingmynjur ïa kano kano ka project.Ka jingpynjulor ïa ka mariang kan sa ktah jur bha ïa ka Meghalaya bad ïa ki nongshongshnong” ong u Bah Kharkrang.
“Ki don bun tylli ki project tourism ba thmu ban pyntrei bad baroh kine kin ieng ha ki jaka Sorkar kaba mut ba ki jaka Sorkar kila nang duna ha ka Jylla kaba dei ka mat ba sngewkhia” ula ong.
“Ha Meghalaya ki don bun ki jaka ba itynnad kiba long trai da ki riew shimet.Ngi kyntu ia ka Sorkar ban pyrkhat ha kaban iatehlok bad kine ki trai jaka na ka bynta ban pyntrei ïa ki project kam jngohkai kiba heh” ula bynrap.
“Ka jingpyniadon bynta lang ïa ki riew shimet ym tang ba kan ïada ïa ki jaka Sorkar na ka jingjah noh, hynrei kan ai kamai pisa bad kiwei ki jingmyntoi ïa ki nongshong shnong shimet ka Jylla.Ia ki jaka Sorkar dei ban buh na ka bynta kiwei ki project kam pynroi, kum ki karkhana pynmih bording haba ai nuksa”.
“Ka jingwan ki construction company nabar ka Jylla ka dei kaba ngi pdiang sngewbha; ngi ioh jinghikai na ki jingshemphang jong ki.Hynrei katto katne percent ki nongtrei bad kiwei ki nongbylla ki dei ban long da ki trai shnong, bad ki trai muluk ka Jylla” ula ong.
“Kaei ka jingmut ka roi ka par bad ki project kiba heh lada ki trai shnong kim ioh jingmyntoi ha ka ioh ka kot bad ka jingpynroi ïa ka sap treikam” buh jingkylli u Bah Kharkrang haba kyntu ïa ka Sorkar ba kan pynduna ïa ka bai register ïa ki nongseng kam lajong kiba dei ki trai shnong.