Nongstoiñ, Risaw 31: Ka jingbym lah jong ka sorkar ban shna ïa ka surok na Mawkynbat sha Nongrangoi kaba tang kumba shiteng kilomitar tam ei ei, ka la buh ïa ki paitbah ha ka jingeh ha ka leit ka wan, ka kit ka bah bad kiwei kiwei ki jingdonkam.
Kum ban pynkynmaw ba ïa ka surok kaba la pynkhlad na Mawbroi la dep siang rong ha kine ki snem ba la dep lyngba ka skhim Pradhan Mantri Gramsadak Yojana haduh Mawkynbat.
Kumjuh ruh ïa ka surok na Nongstoiñ Mawkawah, Khliehmawlieh haduh Nongrangoi la dep siang rong da ka juh ka skhim bad ka bynta kaba sah ka dei satang ha pddeng namar ba ka don ka wah bad ki pynthor kba.
Ka jingbym lah jong ka sorkar ban pynïasoh ïa katei ka surok imat ka dei namar ba ïa ki jaka rep ka shu pan ei ban shna surok, hynrei lada ka sorkar ka lah ban siew da ka dor kaba bit ki trrai pynthor kiba ka surok ka dei ban ïaid kin ym kyrngah ban ai jaka.
Haba phai ha ka leit ka wan na ki shnong kum na Mawïawet, Nongdom, Mawkynbat, Mawsngapwir bad kiwei kiwei ki shnong lada ïa katei ka surok la lah ban pynïasoh ka la pynsuk shibun namar ka jan bha ban pou sha Nongstoiñ. Ha ka leit ka wan ki paitbah na kitei ki shnong ha kine ki sngi haba ki leit donkam sha Nongstoiñ, ki hap ban ïaid na ka lynti ïaid kjat kaba la shna na ka skhim MNREGS kata ruh tang ki kali rit hynrei ka shem shitom haduh katta katta namar ba katei ka lynti ïaid kjat ka la pra lut.
Ha kaba ïadei bad ka jingdonkam jong katei ka surok u bah Yesparly Lyngdoh na ka shnong Lumpyngngad, u la ong ba na ka liang ki paitbah jong baroh ki shnong ka thaiñ Umyiap ki la kwah bad angnud haduh katta katta ba ka sorkar kan mang pisa kyrpang na ka bynta ban pynïasoh ïa katei ka surok, namar ba sha shilliang ka pyntha Umyiap ki don ar tylli ki skul ka Hynñiew sordar Upper Primary School Mawkynbat bad ka ka Umyiap District Higher Secondary School ha Nongdom.
