Shillong, Nailar 19 : U President ka United Democratic Party (UDP), Bah Metbah Lyngdoh, u la ong ba ka thong kaba kongsan jong ka jingïatreilang bad ka HSPDP hapoh ka Regional Democratic Alliance (RDA) ka long ban wanrah ïa ki party riewlum bapher bapher hapoh kawei ka rynsan.
Haba kren bad ki lad pathai khubor hadien ka jingïalang jong ka Central Executive Committee, u Bah Metbah u la ong, “Ka thong jong ka RDA ka long ban pynkhlaiñ ïa ka jingïatreilang bad ka jingïasngewthuh jingmut hapdeng ki party riewlum ha Meghalaya.”
Haba kren halor ka rai jong ka Hill State People’s Democratic Party kaba ïadei bad ka elekshon MP shiteng samoi, u Bah Metbah u la ong ba ka HSPDP ka don ïa ka hok ban shim ïa ka rai jong ka hi.
“Ki don la ka jong ka rukom ban shim ïa ka rai,” u la ong, da kaba pynshai ba um don eiei ban ong halor ka rai jong ka HSPDP ha kane ka por.
U la ong ruh ba ka UDP kan dang peit ïa ka jinglong jingman bad kan shim ïa ki rai ha ka por kaba biang, khamtam ha ki bnai ban wan jong kane ka snem.
