Kyntait u Bah Ardent ïa ka jingkyrpad ka Dr. Ampareen ban sangeh shah thngan

Shillong, Jymmang 26: Ka nongaiktien ka sorkar bad kaba dei ruh ka myntri jong ka sorkar jylla ka Kong Ampareen Lyngdoh ha ka sngi Thohdieng ka la leit ban ïakynduh ïa u Bah Ardent M Basaïawmoit ha jaka ba u pynlong ïa ka jingïakhih da kaba shong shah thngan ban kyrpad ba un sahngeh noh ïa ka jingshah thngan bad ban wan sha ka miej ïakren bad ka sorkar ban phylliew jingmut ha kaba ïadei bad kane hynrei na ka liang jong u u la kyntait lymda ka sorkar ka ai da ka jingthoh sha ka party ryngkat ki jingpynthikna ba kan pynurlong ïa kane ka jingdawa jong u bad ka VPP.
Ka Kong Ampareen ka la poi sha kane ka jaka ba pynlong jingïakhih u Bah Ardent ka la ïathuh ba ka jingwan jong ka sha kane ka jaka ka long ban ai ktien sha u ba ka sorkar ka khot ïa ka VPP sha ka miej jingïakren khnang ba ka sorkar ban sngewthuh ïa ki mat jingdawa ka VPP.
“Phi la tip ïa ki mat jingdawa jong ngi ba ka dei beit halor ka jingdonkam ban pynbeit thymmai ïa ka Reservation Policy namar ngi la rah ruh ïa kane ka mat ha ka dorbar mangtyngka, ngi la ai jingthoh sha ka sorkar jylla bad wat ha ka All party Meeting ngi la rah ïa kane ka mat bad ong ba ka sorkar kam tip ïa ka jingdawa jong ka VPP ka dei ka jingkren khunlung khynnah,” pynphai nia u Bah Ardent.
“Bah Ardent nga sngewkhia ïa ka koit ka khia jong phi wan seh ban ïakren bad weng ïa kane ka jingshah thngan,” ka la ong hynrei u Bah Ardent u la pynphai ktien, “Wat khuslai ïa u Bah Ardent khuslai ïa ka lawei ki khun samla ka ri”.
Na ka lïang ka Kong Ampareen ka la kam ruh ba ka sorkar ka la thung da ka committee kaba kyrpang ba la bynshet ha ka ban khlieh na bynta ban ïatai ïa ka mat jong ka Reservation Policy.
“Wat pyrshang ban ïalam bakla ka committee kaba la thung ka sorkar ka dei beit na bynta ka Roster System ym satia na bynta ka Reservation Policy bad na ka liang jong ngi ngim donkam shuh ban dang shah hikai kaei kata ka Roster,” u la ong.
Na ka liang jong u u la pyneh beit ba ka jingshah thngan kan bteng beit tad haduh ba ka sorkar kan sngap ïa ka jingdawa ba dei ban pynbeit ïa ka Reservation Policy kat kum ka jingdon paid bad u la ong ruh ba un leit sha ka sorkar ban ïakren dei beit tad ynda ka sorkar ka phah da ka jingkhot ïakren ïa ka VPP halor ki mat ba ka dawa ban pynbeit thymmai ïa ka Reservation Policy.
“Nga la wan da lade ban ai kane ka khubor sha phi hynrei phi pan da ka jingthoh te ieh shuwa mynta ngan leit ban ïakren kaei kaba ngi dei ban leh na ka bynta kane ka jingkwah jong phi,” la ong ka Kong Ampareen ïa u Bah Ardent.
Haba kren sha ki lad pathai khubor hadien ba la dep ban ïakynduh sha ki lad pathai khubor, ka Kong Ampareen ka la ïathuh ba ka jingwan jong ka ban ïakynduh ka dei namar ka don ka jingsngewkhia ba u Bah Ardent un shah thngan ‘nga la pynsngew ïa kaei kaba nga don bad ka shong ha i Bah Ardent la in weng ne em ïa kane ka jingshah thngan,’ ka la ong.