Nongpoh, Ïaiong 03: Ki nongïalam shnong na ki 3 tylli ki Shnong hapoh ka Raid Maiong ki la mih shakhmat ban kyntait halor ka jingkynnoh ka Confederation of Ri Bhoi People (CoRP) ba ki Rangbah shnong bad ka Raid ki la leit ban die ïa kata ka jaka kaba don 300 akar ha ka jinglut kaba T.100 klur sha ka MIDC bad ki la pynpaw ruh ba kane ka jingkynnoh ka dei kaba khlem da don nongrim bad khlem da tip ïa ka jingshisha.
Ki nongïalam shnong kiba la mih ba pynshai halor ka jingkynnoh ka seng CoRP na kitei ki 3 tylli ki shnong ki kynthup ïa ka Shnong Umsiang Mawpdeng, Umsiang Maiong bad ka Shnong Umsiang Kraikejam.
Haba kren sha ki lad pathai khubor, u Rangbah Shnong ka Shnong Umsiang Mawpdeng, u Bah Pynshngain Shylla, u la ong ba kane ka jingkynnoh ka CoRP ïa ka shnong Umsiang ka long kaba ym lah ban pdiang bad ka jingkynnoh ka dei kaba la shu kynnoh khem da wad ïa ka jingtip kaba bniah.
U la pynshai ruh haduh mynta hi kam don kano kano ka jingthied jaka ka MIDC ha ka thaiñ Umsiang ba hap ha ka Raid Maiong bad kum ki 3 shnong ki kyntait war ba kam don satia kata ka jingthied jaka ka MIDC bad kim don pat ïa ka jingkitkhlieh lada dei sha kiwei kiwei ki snnong ne ki Raid.
Shuh shuh, u la pynshai ruh da kaba ong, ba ki 3 shnong ki pynshai sha ki paidbah ba kam don kano kano ka jingdie jaka ne ai NOC sop sop sha ka MIDC bad ha kawei ka bynta ki bor shnong ki kyrpang ba nangne shakhmat lada don kano kano ka kam kiba ïa dei sha katei ka thaiñ, kino kino ki kynhun seng bhalang ki dei ban wad jingtip shuwa na ki nongïalam shnong bad ym kum ba la shu kynnoh da ka seng CoRP sha ka shnong khlem da tip ïa ka jingshisha, u la bynrap.
Ha kawei ka bynta, u la pynshai ruh kumba la kam da ka seng CoRP ba ki paidbah sha katei ka thaiñ ki dang sahdien bad duna ha ka jingnang jingstad, kane ka jingkynnoh ka long kaba ym lah ban pdiang bad kum ka jingpyntip na ka shnong Umsiang la mih ki Doctor, ki engineer, ki nongtrei kam sorkar bad ki don ruh ki skul pule kum ka St. Francis ha kaba ki paidbah ha katei ka thaiñ kim dei shuh kiba dang sahdien ha ka jingnang ka jingstad, u la bynrap shuh shuh.
