Kynnoh ki paid Garo ba pyndonkam u briew na Assam da ki SULFA ban wan kam jaka jubor ha ka Shnong Maiong

Nongpoh, Nailur 11: Ka thma ktien kaba jur ka la mih hapdeng ki briew na Assam bad ki briew na Meghalaya ha khappud ba hap ha ka shnog Maiong ha Ri Bhoi District, kaba dei hadien ba ki briew na Assam ki la wan ban kam jaka jubor ha ka shnong Maiong ba la pyrshah jur da ki paidbah na ki shnong Meghalaya.
Ka thma ktien kaba jur ka la mih ka dei hadien ba uwei u briew na Assam ba la tip kyrteng kum u Joyram Sarma lem bad kiwei ki briew ryngkat ki SULFA ki la wan sha ka shnong Maiong ban kam jaka jubor bad hadien ba la pyrshah da ki paidbah na shnong Meghalaya ki la byrgnem byrsit ban siat bad wat ban pynbthei bom ha katei ka Shnoing Maiong, ka shnong khappud ka Meghalaya.
Ïa kane la ïathuh da ka Ringkumuni Marak, kaba dei ka President ka All Meghalaya Garo Women Association, kaba la pyntip ba na ka liang ki paid Garo ryngkat bad ma kum ka nongïalam ki la pyrshah jur halor kane ka jingwan kam jaka jubor sha ka shnong ha Meghalaya.
Ka la ïathuh ba katei ka shnong Maiong ka hap ha ka jylla Meghalaya ha Ri Bhoi District bad ka daw kaba la pynlong ïa ki ban pyrshah jur ïa kitei ki briew na Assam, ka dei hadien ba ki la wan kam jaka jubor ha ka jaka ka Meghalaya ba hap ha ka shnong Maiong.
Shuh shuh, ka la pyntip ruh kitei ki briew na Assam ki la byrngem byrsit lai phewjaid hadien ba la pyrshah da ki paidbah bad dei hadien da ka jingwan poi noh ki Pulit na Pilangkata ba kitei ki briew ki la phet noh ryngkat kitei ki SULFA ba la pyndonkam da utei u Joyram Sarma, uba la nud ban wan kam jaka jubor wat sha u pud u sam ka Meghalaya ha katei ka shnong Khappud ka Meghalaya.