Nongpoh, K’lyngkot, 03: Kum uwei u rangbah ba la ju ïakhun teng ïa ka election MDC na Umroi bad uba dei ruh u rangbah ba don bynta ha kaba thaw ïa ka Umroi Constituency Progressive Forum (UCPF) kum u Working President, u Bah M.D Syiem mynta ka sngi la kynnoh ba u la leit ban rung sopsop sha ka seng Congress da kaba u la mih noh na ka UCPF kum u Working President ban pan ticket na ka party Congress ban ïa aireng ha ka election MDC na Umroi Constituency.
Kumba la ioh lum jingtip, la ong ba ki nongïalam ka party Congress ki la pdiang burom ïa u Bah MD Syiem ha ka jingïalang kaba la pynlong ha kawei na ka jaka ha Umroi Umdohbyrthih, ha kaba la sakhi da ka jingdon lang ki heh nongïalam ka party Congress na MPCC, Ri Bhoi District Congress Committee bad na Umroi Block Congress Committee.
Halor kane ka jingrung u Bah M.D Syiem sha ka party Congress, um kwah satia ban pyntip sha ki lad pathai khubor bad u kwah ne angnud haduh ba ka party Congress kan sa pynbna ïa ka Ticket MDC na katei ka Constituency.
Kumba la ioh lum jingtip na ki nongïalam ka UCPF kiba ym kwah ban pynpaw kyrteng, la ong ba ha ka UCPF ki don 4 ngut kiba la pan ïa ka ticket ba kynthup ïa u Bah George B. Lyngdoh, MLA barim ka Umroi, u Bah M.D Syiem, u Bah John Syiemiong bad ka Kong Ïaishah Rymbai, hynrei dei hadien ba ki dkhot ka Election Committee ka UCPF ka leit kylleng ki jaka ban sngap ïa ka sur u paidbah, ha kaba ka sur u paidbah ka noh sha u Bah George B. Lyngdoh MLA barim ba kan sa pynlong ïa u Bah M.D Syiem ban phet noh sha ka party Cognress na ka daw ka jingbym ioh ticket MDC.
La ong ruh ba u Bah Syiem dei hadien ba u la sngewthuh ba un nym ioh ticket na ka UCPF u la byrngem ban pynpait pynpra ïa ka UCPF ba ïa ka ticket la rai ban ai ïa u Bah George B. Lyngdoh bad wat la katta ruh ban pynïatylli ïa ka UCPF u Bah George B. Lyngdoh u la weng ïa ka kyrteng ban long kum u Kyrtong bad ba ai noh ïa u Bah M.D Syiem, hynrei kaba pynsngewlyngngoh ïa kiba bun ki dkhot ka UCPF ba u Bah M.D Syiem wat la u la ioh ïa ka ticket bad u dang leh pat ïa katei ka kam ban leit ban pynïasoh sha ka party congress na ka bynta ka ticket ha kaba bun ki nongïalam bad ki dkhot ka UCPF kim don jingtip satia, kaba la long kum ka jingshet kylla haba la thaw ïa kane ka Umroi Constituency Progressive Forum (UCPF). Ïa kane la pynpaw da ki katto katne ki dkhot ka UCPF kiba ym kwah satia ban pynpaw kyrteng.
