Shillong, K’ Lyngkot 03: Ka State Bharatiya Janata Party (BJP) shen kan sa lah ban pynbna ïa ka thup kyrteng jong ki kyrtong na ka bynta ki elekshon ban wan sha ki autonomous district council (ADCs) ha u taïew ban wan.
Haba ïathuh ïa kane ha ka sngi Thohdieng, u nongaiktien ka BJP u Bah M Kharkrang u la ong ba ka party ka la rai ban pynïakhun na baroh ki 29 seat jong ka Khasi Hills Autonomous District Council (KHADC) bad na ka Jaiñtia Hills Autonomous District Council (JHADC).
U la ong ba u state president un sa wan sha Shillong ha u taïew ban wan bad mardor un sa khot bad ban lum ïa ka jingïalang ban ïakren bad ïasyllok halor ki elekshon sha ki ADC.
“La kumno kumno ka thup kyrteng jong ki kyrtong ka seng yn sa pynbna ha u taïew ban wan,” bynrap u Bah Kharkrang.
Lah ban kdew hangne ba ki elekshon sha ka KHADC bad JHADC la buh ban pynlong ha ka 21 tarik u bnai Rymphang mynta u snem.
Kiba bun na ki seng saiñ hima sima ba kynthup ïa ka National People’s Party (NPP), ka Congress, ka United Democratic Party (UDP), ka Hill State People’s Democratic Party (HSPDP), ka Voice of the People Party (VPP) bad ka Khun Hynñiewtrep National Awakening Movement (KHNAM) ki la dep ban pyllait ïa ki jong ki kyrtong jong ki na ka bynta ki elekshon sha ki ADC.
