Kynnoh ka samla Khasi ba pyrshang batbor u Manager bar jylla ka Petrol Pump

Nongpoh, Nailur 03: Kawei ka samla Khasi (ba la buhrieh kyrteng) kaba trei ha kawei ka Petrol Pump, ha Ribhoi District ka la kynnoh ba u Manager bar jylla uba peit ïa kane ka Petrol Pump u la pyrshang ban thombor ïa ka longrynieng jong ka. Kane ka la jia ha ka por shiteng sngi jong ka sngi Palei ha ka taiew baladep. Katku ka jingtip ba la ïohlum la ïathuh ba kane ka samla ka la lait thaw na ki tyrsim jong une u runar hadien ba ka la ïakhun pyrshah bad ïaksaid bad ïa kane ka jingjia la ïohi ruh da kawei ka paralok kaba ïatrei lang hapoh kane kajuh ka Petrol Pump.
La ïathuh ba u Manager bar jylla uba la thmu ban leh ïa ka kam sniew u dei uba la tip kyrteng kum u Raj Kumar,na ka jylla Rajasthan.
Kumba la phla da katei ka samla, la ong ha kaba nyngkong u Manager u la bthah ïa katei ka samla ban shet jingshet na ka bynta ka bam sngi na ka bynta ki nongtrei bad ïa u trai joing ka Petrol Pump, hynrei katba ki dang pynkhreh ban sait ïa ki tiar ki tar, u Manager u la patan jubor ïa katei ka samla sha kawei ka kamra da kaba thmu ban leh sniew pyrshah ïa ka longrynieng jong ka
Halor kane ka jingjia, ki bahaïing hasem jong katei ka samla ki la leit ban ujor noh da ka ejahar pyrshah ïa u Manager ha Nongpoh Police Station ba ka aiñ kan leh ïa kaba donkam.
Katkum ka jingtip ba la ïohlum, ïathuh ba ki Pulit jong ka Ri Bhoi ki la pyllait noh ïa u Manager wat hadien ba ladep ban kem ïa halor katei ka jingkynnoh da katei ka samla halor ka nongrim ba ki bahaïing jong ka Samla ki la leit ban weng noh ïa ka ejahar kaba ki la ujor ha Police Station pyrshah ïa u Manager ïa kaba ym pat lah satia ban tip na kaei ka daw ba ki bahaïing ki la weng noh ïa ka ejahar.