Kyntu ka HANM ïa ka Sorkar Jylla ban kren halor ka jingpyndik ka Assam ïa ki Khasi-Pnar

Jowai, Nailur, 03: Ka Sorkar Meghalaya ka dei ban kren noh wut wut naduh mynta ka sngi ïa ka sorkar Assam ba kim dei shuh ban leh beiñ ïa ki Khasi Pnar ha Cachar Hills bad kiwei ki jaka lym kumta ka seng kan sdang ban leh da ka kam pyrshah ïa ka Assam, ong ka HANM ha ka jingïalang pynskhem nongkitkam ha ka shnong Pdengchakap ha ka sngi Saitjaiñ.
U President ka HANM u Bah Lamphrang Kharbani, u la pynpaw ba ka mynsiem jong ka seng ka tyrha haba ïohi ba ki Khasi Pnar ki shah leh beiñ ha ka Assam hapoh Cachar Hill bad kumjuh ha Lapangap Block-1 bad Block-2.
Kumta ka seng ka maham tyngeh ba ka Sorkar MDA- 2 ka dei ban ïakren noh naduh mynta ba ki nong Assam ba kim dei shuh ban pom ïa ki dieng kwai, ki tympew jong ki paradoh para snam ladei hangno hangno ruh.
Lada ki nong Assam ki dang bteng ïa kine ki kam be-aiñ, ka seng kan sdang noh ban pynthud ïa ki nong Assam kiba sah ha Meghalaya la ki dei kiba trei kam Sorkar, trei Contract, kiba pule ne kiba khaïi ruh lada ngim lah shah shuh ngim tip kaei ka ban jia ong ka HANM.
Kumta ka Assam ka dei ban bthah ïa ki briew la jong ba kin sangeh noh ka jingpynwit pynthut ïa ki Khasi Pnar khnang ban wanrah ïa ka shongsuk shongsaiñ kumba long baroh shikatta bad kum ki jylla kiba ïa shnong marjan.