Kynnoh ka GSU ba leh politik ka VPP ïa ka RP maham ban ym ktah ïa ka 40-40 %

Shillong, Jymmang 29 : Ka Garo Students Union (GSU), ka la kynnoh ba ka Voice of the People Party (VPP) ka leh politik halor ka jingdawa ban bishar thymmai noh ïa ka Reservation Policy bad ka maham ruh ïa ka Sorkar Jylla ba ka jingbishar thymmai ïa ka Policy kam dei ban ktah ïa ka jingsam bhah ba 40:40 % ïa ki Khasi Jaintia bad ki Garo.
Ka Garo Students Union (GSU) lyngba u President Zikku Balgra N Marak, ka la kynnoh ba ka VPP ka la leh politics ïa kane ka kam da kaba buhrieh lut ïa baroh ki jingshisha bad ai ïa ki jingtip kiba shu thaw hi sha ki paidbah.
“Ha ka jingpyrshang ban pyntyllun shakhmat ïa ki buit politics jong ka, ka VPP ka kloi ban ïalam a ka Meghalaya sha ka jingjia kumba jia ha Manipur lane kaba kham palat” ong ka GSU halor ka jingïakhih ka VPP ban pynbor ïa ka Sorkar Jylla ba kan shong bishar thymmai ïa ka Job Reservation Policy ka Jylla.
Ka GSU ka la ong ba wat hapdeng shibun ki jingkynnoh bad jingkam jong ka VPP, kane ka party kam shym la lah ban ai jingkheiñ ba la ïoh na ki Tnad Sorkar ban kyrshan ïa ki jingkam jong ka- ba ki Khasi ki la duhnong, shah pynduh bad ba kin sa duhnong.
“Halor kano ka jingkheiñ jingdiah ba ka VPP ka la pynmih ïa kane ka jingkam. Ka jinglong jingman ka Ri-lum Garo bad wat ka Ri-lum Khasi bad Jaintia, ka la paw, ka bym lah kyntait bad ka dei ka kot kaba baroh ki lah ban pule” ong ka GSU.
Halor ka jingkam ba ki samla Khasi ki ïaid khlem kam khlem jam, u Marak ula ong “Kane ka long kaba shisha wat ïa ki samla Garo bad lada kheiñ bha, phin shem ba kham bun ki Garo hynrei ka VPP ka jied ban buhrieh ïa kane ka jingtip ba donkam bha”.
“Ka Ri-lum Khasi ka la ïohnong bha da ka jinglong ka Khun ba ieid eh ka Meghalaya naduh ba ioh Jylla la ka jong na kata ka daw ka jingkylli ba ki shah pynduh, ka dei ka bym don nongrim” ula bynrap.
Namar kane ka jingïakhih ka VPP, ka GSU kala buh ïa ka jingdawa ba ka Sorkar Jylla ka dei ban kren shai/pynbna ryngkat ki jingkheiñ halor ka jingdon ki kam ba khlem pat pyndap jong ka bhah ki paid Garo ha ka jingthungkam ha kine ki 50 snem bala leit noh.
Ka GSU kala dawa ba ka Sorkar Jylla ka dei ban thungkam pyndap shuwa ïa ka bhah baroh jong ki paid Garo da kaba pynlong ïa ka jingthungkam ba kyrpang.
Nalor kane, ka GSU ka la dawa ba ka Sorkar Jylla ka dei ban pynsangeh shuwa ïa baroh ki jingthungkam na kiwei kiwei ki Jaidbynriew tad haduh ban da dep thung pyndap shuwa ïa ka bhah ka khlem pat pyndap jong ki paid Garo.
Ka GSU kala ong ba katba ka Sorkar kam pat pyndap shuwa ïa ka bhah thungkam jong ki Garo naduh ki snem ba la leit noh, kam dei satia ban mih ka jingkylli ban ïakren halor ka Reservation Policy.
“Ngi ki Achik ngi don ka hok ban ïoh ïa ka bhah bad lada donkam, ngin leit tynjuh sha ka ïing bishar ban ïoh ïa ka jingbishar kaba hok” kala ong.
Ha kajuh ka por, ka GSU ka ong ba lada ka Sorkar ka kwah ban shong bishar thymmai ïa ka Job Reservation Policy, ka dei ban thung da u Special Retired/ Sitting Judge jong ka ïing bishar Supreme Court khnang ba kan ïaid kat kum ki kyndon ba donkam bala kdew ha ka Riti Synshar ka Ri kata halor ka jingsahdien bad ka jingduna ki Nongmihkhmat.
“Lada ka Sorkar ka kwah ban shong bishar thymmai, ka Job Reservation Policy kam dei ban ktah ïa ka bhah ba la ai sha ki Khasi Jaintia bad Garo kaba long 40:40 %” ong ka GSU.
Ha kajuh ka por ki Sengbhalang ba paw ka Ri-lum Garo kila rai lang ban kyntait ïa ka jingkhot jong ka Sorkar ban ïakren halor ka Reservation Roster haba dawa ruh ïa ka Sorkar Jylla ba kam dei ban pynkhih ïa ka jingsam bhah jong ka State Reservation Policy.
Kine ki Sengbhalang ki kynthup ïa ka Garo Students’ Union (GSU)- CEC, Garoland State Movement Committee (GSMC), A.chik Youth Federation William Nagar (AAYF), AAYWS bad kiwei kiwei. ïa kane ka rai la shim ha ka jingïalang ba long mynta ka sngi ha Tura, kaba ïatai halor ka jinglong jingman halor ka Roster System hapoh ka Jylla.
“Ngi ki sengbhalang ka Ri-lum Garo ngi la ïashimlang ïa ka rai ban nym leit ïashimbynta ha ka jingïalang ban ïakren halor ka Roster System, kaba la buh ban long ha Shillong bad ka ban pynïaid da u Myntri Rangbah ka Jylla Conrad K Sangma” ong ka kyrwoh na kine ki seng.
Kine ki Sengbhalang ki la pynbna ruh ba ka Reservation Policy ha Jylla kam dei satia ban don kano kano ka jingpynkylla. Ki la ïengskhem ha ka nongrim ba ym dei ban leh shiliang ha ka jingthungkam kat kum ka Roster la ka dei kaba treikam naduh ki snem ba la leit noh ne nangne shakhmat.
Kine ki Seng ki la dawa ruh ban kynthup lang ïa ki jingbym lah pyndap ïa ka jingïohkam ki paid Garo ha ki snem ba la leit (backlog) haba ban jur ban ïaid kat kum ki jingkheiñ jingdiah kiba paka.
Kine ki Seng ki la pynpaw ruh ïa ka jingkut jingmut ban ïeng ïada pura ïa ka hok bad ka bha ka miat jong ka Jaidbynriew ba ki mihkhmat. Ki la kren da kaba shai kdar ba lada donkam, kin ym artatien ban pynlong ïa ki jingïakhih bapher bapher ban pynthikna ïa ka jingpyntreikam ba khlem shah liang ïa ka Reservation Roster System.
“Ngi kren da kaba shai, lada donkam, ngin pynlong da ki jingïakhih bapher bapher khlem ka jingartatien ha kaban pynthikna ba kan don ka jingleh hok haba pyntreikam ïa ka Reservation Roster System” kila ong.