Kynnoh ba kam kynti ka riewshimet ïa ka khyndew, mih paidbah ki 5 shnong ha Langja

0

Nongstoiñ, Ïaiong, 11: Ki 5 tylli ki shnong kiba na ka thaiñ Langja myn ha ka sngi saitjaiñ jong ka taïew, lyngba ki nongsynshar shnong ki la pynlong ïa ka jingïalang paidbah ha ka shnong Umthlu kawei na ki shnong ha ka thaiñ Langja.
La ong ba katei ka jingïalang paidbah ka long kum shi bynta ban pynshai paidbah, namar ka jingkam trai jong kawei ka riew shimet ïa ka thaiñ Langja hi baroh kawei. Ki nongsynshar shnong ki la kynnoh ba katei ka longkmie ba la tip kyrteng ka Trinli Syiemïong, ka la kam nongkynti ïa ki jaka jong ki paidbah, ha kaba la ong ruh ba ki la don kumba 8 ïing ei ei kiba la ïasnohktilang ban ai jingkyrshan ïa katei ka longkmie.
Ki nongsynshar kiba la ai jingkren ha katei ka jingïalang, ki la kynnoh pyrshah ïa katei ka longkmie da kaba ki la ong ba katei ka longkmie ka la kam ïa ki jaka puta ym tang 5 shnong. Hynrei ïa ki 10 tylli ki shnong kaba kynthup ïa ka shnong Mawribah, Langja, Umthlu, Khyllemsangrin, Ktieh-thawiar, Pynden-sohstap, Mawjari, Ummawrie, Kyr-dum bad ka Umnehlang, da kaba ka la kam ba ki dei ki nongkynti jong ka.
Hynrei, naduh ki snem 1953 mynba kitei ki shnong ki dang hap tang hapoh kawei ka shnong ïa kaba la tip kum ka Langja, ki don hapoh ka jingpynïaid jong ka Jyrngam Sirdarship bad ki la don ruh ïa ki kot ki sla ban pynshisha ba ki dei ki jaka puta kiba pura jong u paidbah. Pynban dei tang naduh u snem 1957 ba katei ka longïing ka la kam trai jubor ïa ka thaiñ hi baroh kawei pateng la pateng haduh kine ki sngi, ong kitei ki nongsynshar shnong.
La kynnoh shuh shuh ba ka shnong ka la shah pynduh ruh wat ïa ki kam pynroi kiba wan lyngba ka scheme sorkar, namar ka jingleit ujor katei ka longkmie ryngkat ka kynhun jong ki.
Ha katei ka jingïalang paidbah la ïadonlang ki sordar shnong bapher bapher kynthup ïa u Dreston Kharsyiemlieh, u Albinus Langrin, u Shaiñborlin Syiemlieh, u Wilphun Shangdiar bad kiwei kiwei ki sordar bad la pynïaid ïa katei ka jingïalang da u bah Likshon Syiemlieh.
Ha kane ka jingïalang da kawei ka sur hi ki paidbah ryngkat ki nongsynshar shnong jong ki 10 shnong, ki la rai ban ieng pyrshah beit bad ban ïakhun beit, ban ym ailad ïa katei ka longkmie ban shu wan kam trai jubor ïa ki jaka puta ba la shong la sah da ki paidbah nongshong shnong.

Leave A Reply

Your email address will not be published.