Kynmaw burom ki khun ki hajar ka Hima Maharam ïa ka sngi ïap u Sngap Sing Syiem

Mawkyrwat, Nohprah, 01: Kum ka jingkynmaw burom ïa ka lyngkhuh sngi ïap kaba 175 snem jong u Syiem Sngap Sing Syiem, ki khun ki hajar jong ka Hima Maharam ha ka sngi Palei ki la rakhe kynmaw burom ïa kane ka sngi ba kyrpang da kaba leit buh syntiew ha u dur mot jong une u khlawait ha ka shnong Mawtngam, bad ha Sngap Syiem College, Mawkyrwat.
Ha ka jingrakhe ïa kane ka sngi, la sakhi lang da ki sengbhalang ba kynthup ïa ka KSU, HYC South West Khasi Hills District bad Central Body, ka HITO, HANM, SSSS South West Khasi Hills District, SSS Mawlyngwir, ki khun saw pateng jong ka kpoh Mei-ïew jong u Syiem Sngap Sing Syiem, ka Sngap Syiem College, Mawkyrwat bad kumjuh ruh ka ki bor synshar ka South West Khasi Hills District.
Ha ka shnong Mawtngam, la plie ïa ka kynroh ba la ker ïa u mot tei nam jong une u Syiem, da u MLA jong ka Mawkyrwat Constituency Bah Renikton Lyngdoh Tongkhar, ryngkat lang bad u Syiem jong ka Hima Maharam u Pa’iem Niandro Syiemïong, u Manager jong ka Kur Syiemlieh u Bah Anderson Syiemlieh, u Principal jong ka Sngap Syiem College, Mawkyrwat u Dr. K.K. Nongsiej, Myntri na ka Synjuk Nongsynshar Shnong jong ka Hima Maharam, ki nonghikai bad ki samla pule jong ka Sngap Syiem College Mawkyrwat.