Shillong, Nohprah 01: U Symbud Myntri Rangbah ka jylla u Bah Sniawbhalang Dhar ula pyntip ba ka sorkar jylla, ka la ïaid shakhmat ban tei da ki jaka pynieng kali (Parking Lot) kiba thymmai ha kylleng ki jaka bad ki don ruh kiba ki kam ki jam kila nang ïaid shakhmat mynta.
U Bah Sniawbhalang Dhar ula ong, ba ka sorkar kan sa tei da ki parking lot ne ki jaka pynïeng kali kiba thymmai bad ha kane ka taiew yn sa mang ban tei ïa ki artylli ki Parking Lot.
Ula ong ba ha kitei ki Parking Lot, yn lah ban pynïeng ne set haduh kumba 500 tylli ki kali.
Ula ong ba ka sorkar kan sa pyndonkam ruh ïa ki katto katne tylli ki jaka ki bym shym la pyndonkam da ki tnad sorkar khnang ba yn ïoh ban tei noh da ki Parking Lot.
U Bah Sniawbhalang ula pyntip ba ka sorkar ka la dep ban khot ïa ka Tender na ka bynta ban tei 2 tylli ki Parking Lot, kawei yn tei hajan ka Secretariat katba ïa kawei pat dang wad ïa ka jaka.
Na kaba bynta ban ïaleh ban pynduna ïa ka jingkhapngiah, u Symbud Myntri Rangbah ula ong ba ka sorkar ka la pynkhreh ban
pynkynriah noh ïa ka Secretariat bad ïa ki katto katne ki ophis sorkar sha New Shillong bad ynda la dep ban pynkynriah ïa kitei ki ophis kan sa ïarap ha ka ban pynkylluid bad ban pynduna ïa ka jingdheng kali kaba ki paidbah kila mad jingeh bha baroh shi katta.
