Kynjoh ka India sha ka 100 tylli ki takma ha ka Asian Games 2023

Hangzhou Risaw 07 : Katba ka India ka la kynjoh sha ka100 ha ka jingïoh khur takma ha kane ka 19th Asian Games kaba long ha Hangzhou hynne ka Sngi Saitjaiñ, ka thei nongïalehkai squash jong ka ri, ka Anahat Singh ryngkat bad u Jaggy Shivdasani ki la ïoh ban thaw ïala ka jong ka history ha kane ka lympung lehkai.
Ka Anahat ha ka rta ba 15 snem, ka dei ka nongshimbynta ba dang khynnahtam jong ka ri ban khur takma na katei ka lympung ha Hangzhou katba u Jaggy Shivdasani, u thaw history da kaba khur takma ha ka rta ba 65 snem.
Ka Anahat, kaba la kha ha u bnai Lber, 13 tarik, 2008, ka la don bynta bad kynhun jong ka India kaba la khur takma rnong ha ka jingïalehkai jong ka thup\ women’s team bad ruh ka mixed doubles events Squash.
Katba na ka liang jong u Shivdasani, u ba la kha ha u Rymphang, 16 tarik, 1958, u la jop takma rupa na bynta ka kynhun India kaba shimbynta ha ka Men’s team event jong ka bridge.
“Tang ba la ïoh khur takma, kumba long kiwei, ka long shisha, kaba sngewkmen. Ban ïoh takma rnong, ka long kaba sngewtynnat, khamtam haba ngi bishar ïa ka snem jong nga. Ka la pynkmen shisha ïa nga, hynrei kan dang kham sngewhun shuh shuh lada nga ïoh khur da ka takma ksiar lane rupa,” la ong ka Anahat Singh hadien ba khur ïa ka takma rnong ha ka mixed double ryngkat bad u paralok jong ka, u Abhay Singh.
Katba na ka liang jong u Jaggy, kane ka dei ka sien kaba ar ïa u ban khur takma na ka Asian Games. U la don bynta bad ka kynhun kaba la jop takma rnong ha u snem 2018 ha Indonesia ha ka por ba ka jingïalehkai bridge ka la ïoh jingithuh ha kane ka tamasa lehkai.
U Shivdasani u la ong ba India ka la sdang ban kiew naduh snem 2018 bad dei na kata ka daw ngi sngewsih ba ngi shah rem noh ha ka final.
“Ngim da sngewsih than. Ngi la jop takma rnong ha ka por ba ladep ( ha Jakarta-Palembang 2018), bad ha kaba sdang, lada phi ong ïa nga ba ngin ïoh khur da ka rupa, Ngan jin da la shim beit bad ngan nym lehkai,” u la ong.
Shuh shuh, na ka liang jong u Shivdasani u la pynpaw ba ka bridge ka la ïoh jingithuh kum ka wei na ki jingïalehkai jong ka Olympic hynrei mynta ka dang ap ïa ka jaka. U la pynpaw ruh la u dang don ne em ban shimbynta lada kane ka jingïalehkai kan ïoh jingithuh ban rung sha ka tamasa Olympics.
“Hynrei ïa mynta, la ñiew ïa ka kum kawei na ki Olympic sport, hynrei ym pat shym la ïoh jaka ban pynrung ïa ka, Hynrei nga kyrmen ba kane ka jingïalehkai kan ïoh jingithuh kum kawei na ki jait Olympic sport bad shen ngin sa ïoh ban shimbynta. Kane kan kham sngewtynnat,” u la ban biang.
Na ka liang jong ka Squash ka la nangjan ban shah kynthup ha ka Olympic Games. Ha ka 125th IOC Session kaba la long ha Buenos Aires, ka IOC ka la kyrshan ïa ka wrestling ban ïa ka squash lane baseball/softball.