Mawkyrwat, Nailur 21: Kum shibynta jong ka jingrakhe ïa ka 11th Ayurveda Day Celebration 2026, na ka liang ka 10-Bedded Integrated AYUSH Hospital, Mawkyrwat, ka la pynlong ïa ka jingïakop mareh marathon kaba kyrteng ka “Run for Ayurveda” ha Mawkyrwat, South West Khasi Hills District.
Ka jingpynlong ïa kane ka “Run for Ayurveda” ka long ban pynsngewthuh paidbah shaphang ka Ayurveda bad ban pynshlur ïa ki paidbah ban pdiang ne leh ïa ka rukom im jong ki kaba koit ba khiah la ka long ha ka met ka phad ne wat ha ka jingmut jingpyrkhat, bad kum shibynta ban pynneh ïa ka koit ka khiah ha baroh ki liang.
Ha kane ka jingïakop la wan shimbynta da ki shynrang bad kynthei kiba hap ha ka rta kaba 18 haduh 55 snem, ryngkat bad ki khynnah shynrang bad kynthei kiba hap ha ka rta kaba 13 haduh 17 snem ha kaba kane ka jingïakop ka la sdang ha ka por 6 baje mynstep na phyllaw jong ka 10-Bedded Integrated AYUSH Hospital, Mawkyrwat, kaba don hajan ka Civil Hospital, Mawkyrwat.
Kiba la wan ïashimbynta ha kane ka jingïakop baroh ka long 200 ngut.
Ki nongjop ha kane ka jingïakop ki long ha ka liang jong ki shynrang ba 18 haduh 55 snem dei u Wonderful Paliar, u Jinesfulson Hoojon bad u Maikhelsing Ramsiej. Ha ka liang jong ki kynthei pat, ki nongjop ki long ka Phaidashisha Lyngdoh, ka Lyntijingkyrmen Kharjahrin bad ka Shanobel Thongni-Rit.
Nangta, ki nongjop ha kane ka jingïakop ki long ha ka liang jong ki khynnah shynrang ba 13 haduh 17 snem dei u Banteibok Kharjahrin, u Mebanker Kharjahrin bad u Bilestar Marweiñ, katba ki nongjop jong ki khynnah kynthei ki long ka Larijanai Wartde, ka Ribapynsuk Nongsiej bad ka Phibaniaineh Lyngkhoi.
Ïa kane ka jingïalang la pynlong hapoh ka jingïalam jong ka Dr. B. Nongtraw, In-charge jong ka 10-Bedded Integrated AYUSH Hospital, Mawkyrwat, ha ka jingïadonlang jong Dr. N. Lyngdoh, Dr. A. Shylla, Dr. Banlum Lyngdoh, Dr. L. Iawphniaw, ryngkat bad ki nongtrei jong ka hospital kiba la ai ka jingïatreilang bad kaba la long ka jingjop.
Ha kajuh ka por, ka 10-Bedded Integrated AYUSH Hospital, Mawkyrwat, ka pynpaw ruh ïa ka jingsngewnguh kaba kyrpang sha ka District Sports Office, South West Khasi Hills District, ki pulit Traffic jong ka Mawkyrwat Police Station, ka District Medical & Health Office, ka Medical Superintendent jong ka Civil Hospital, Mawkyrwat, bad baroh kiba la ai ïa ka jingïarap, jingïatreilang bad jingtrei shitom ban pynlong ïa kane ka prokram kaba seisoh.
