SHILLONG, Nailur 21: Ka Malki SC ka la wanphai na ka jingshah rem ha ka jingïalehkai ba nyngkong da kaba jop 3-2 pyrshah ïa ka Nongthymmai SC hynne ka sngi Nyngkong ha ka lympung Shillong Sports Association First Division Football league 2026, ha madan First Ground-SSA Stadium, Polo.
Shuwa kane ka jingïakhun, ka Malki ka la shah rem da 2-1 ha ka Nongkrem, katba ka Nongthymmai kane kadei ka jingïalehkai ba nyngkong jong ka ha ka Group A. Da kane ka jingjop, ka Malki ka la kyntiew ïalade shipor sha ka kyrdan ba ar ha ka Group.
Ka jingïakhun ka la long kaba itynnad ha kaba baroh arliang ki la ïoh ban lamkhmat markylliang ïa ka jingïalehkai. Ka Nongthymmai ka la pynkhihjar dang kloi lyngba u Kostar (1’) hynrei ka Malki ka la pynïakhaid lyngba u Valerian L Lyngdoh (27’) shuwa ban lamkhmat kylla na ka kol jong u Nali Rangsong (41’).
Ka jingïakhun ka la ïakhaid biang hadien ba ka Nongthymmai ka la pynkhihjar biang lyngba u Badonkupar (61’) hynrei tang hadien saw minit ka Malki ka la thep ïa ka namtam lyngba u Rangdajied Rynjah (68’) ban khur pura ïa ki lai point.
Ka jingïakhun jong ka SSA 1st Division Football League 2026 ha kane ka sngi Ba-ar (22.09.2026) kan long ha ka por 12:15 baje mynsngi hapdeng ka Mawkhar SC pyrshah ïa ka Nongrim hills SC ha ka Group B.
