Shillong, Nailur 21: Ka Meghalaya Police ka la pynjemkhnap khlem jingmap ïa ka Mylliem, kaba don sha trai duh jong ka miej, da kaba pynliem 5-0 kol ha ka jingïakhun hynne ka sngi Nyngkong ha ka lympung Shillong Premier League 2026, ha SSA Stadium.
U Balmingstar Lyngkhoi (4’, 31’, 68’) u la nohsynñiang da ka hat-trick na ka bynta ka kynhun, katba u Everestarly Rynjah (61’) u la pynkhihjar shi sien kynthup bad ka kol ba la kum thep hi (own goal) da u Fedrick Wahlang (77’).
Kumba ka paw, ka jingïaknieh kyrdan ba kham shakhmat ha ka miej kheiñ point ka long kaba jur, bad kine ki lai point ki la long shisha ka jingmyntoi na ka bynta ka MLP, kaba la kyntiew ïa lade na ka kyrdan ba phra sha ka kyrdan ba lai ha ka shisien ïakhun. Mynta ka ïaryngkat point bad ka Langsning hynrei ka don ïa ka rekod jingjop pyrshah ïa kane ka lahduh jong u snem ba ladep.
Ha kawei pat ka liang, ka Mylliem ka dang ïaineh sha trai duh jong ka miej da tang 1 poiñ na ki hynriew tylli ki jingïalehkai bad ka don hapdeng ka jingma kaba khraw namar ka lah ban shah pynhiar kyrdan ynda la kut ka samoi.
Ha ka jingïalehkai, u Fedrick u la long uba sniewbok tam, namar ka kol ba nyngkong bad kaba khatduh ki la jia namar ka jingbakla jong u. Kaba nyngkong ka la jia ha ka por ba une u rangap dien ka Mylliem, u la pashat ïa ka bol shadien hynrei ka bol kam shym la poi sha u rangap-kol u Rihoklang Khongjoh namar ka jingsngem um ka madan kaba la pynsuki ïa ka jingtyllun jong ka bol. Kane ka la plielad ïa u Balmingstar ban mareh pynstet bad pynkhih ïa ka kol ba nyngkong.
Nangta u Balmingstar u la pynjlan arshah ïa ka kol lamkhmat hadien shiteng kynta ba la ïaid ka por, da kaba pynïasoh tiak da ka khlieh ïa ka bol pashat jong u Rapborlang Marwein, kaba pynlong ïa ka MLP ban tam da 2-0 ha ka por shongthait.
U Evereststarly u la pynbud ïa ka kol kaba lai na ka bynta ka MLP, da kaba thep na ka bol pashat jong u Bisharlang Kharumnuid, bad tang hadien katto katne minit u Balmingstar u la pyndep ïa ka hat-trick ka jong u.
Ka kol kaba khatduh ka la wan na ka bol pashat jong u Rapbor, ha kaba u Fedrick u la kum bakla thep hi ha ka jingpyrshang jong u ban khanglad ïa ka bol.
Na ka bynta ka MLP, kane kadei ka jingïalehkai ba nyngkong ba kin pyndep khlem da shah thep ha ka liang pyrshah.
Ka jingïakhun mynta ka sngi kan long hapdeng Langsning pyrshah ïa ka Nangkiew Irat ha ka por 3 baje nohphai sngi.
