Kynjah ka sor Nongpoh, khang lut ki dukan ba snoh kti lang ki paidbah ban pynrem ïa u runar pynïap briew

Nongpoh, Nailur 30: Ka jingshah pynïap kawei ka samla na ka Shnong Iewmawlong ha u riew thrang snam bad uba dei ruh u bar jylla ka la ktah shisha ïa ka jingmut jingpyrkhat ki paidbah ka thain Nongpoh bad wat ha Ri Bhoi hi baroh kawei, namar kane ka jingjia ka la ktah shisha ïa ka imlang ka sahlang ha kaba tang na ka daw ka jingthrang snam utei u bar jylla ka samla ka duh ei noh ïa la ka jingim kaba ka la shah pynïap ha utei u runar uba don ka jingïadei bad katei ka samla.
Kum ban pynkynmaw, kane ka jingjia ka la jia ha ka 26 tarik u Nailur 2022, ha kaba kawei ka samla ba la tip kyrteng kum Nisha Nongbet na ka Shnong Iewmawlong, ka la duh noh ïa ka la jingim hadien ba ka la shah ot na ryndang bad shah dung da ka tari ha u samla jongka, u ba dei u bar jylla, u Birbahadur Thapa bad halor kane ka jingjia kum ka jingpynrem ïa utei u runar ki paidbah ryngkat ki seng bhalang ki la ïa snoh kti lang ban pynlong ïa ka jingïaid paidbah na ka bynta ban pynrem halor kane ka jingjia bad dawa ruh ïa ka hok jong katei ka samla kaba la shah pynïap.
Da ki hajar ngut ki paidbah kynthei bad shynrang ryngkat ki seng bhalang naduh ka RBYF, KSU, HNYF bad FKJGP na Nongpoh Circle ha ka lama ka Joint Action Committee (JAC) mynta ka sngi ki la pynlong ïa ka jingïaid paidbah ban pynrem halor kane ka jingjia pyrshah ïa katei ka samla da kaba rah ïa ki lama ïong, ki placard bad ki banner ryngkat ki jingthoh pynrem ïa utei u runar ba ki bor ka aiñ ka dei ban pynshitom jur ïa utei u runar wat lada dei ban sdien phasi ne set along shi jingim.
Kumba la sakhi lyngba jong kane ka sngi ba la pynlong ïa kane ka jingïaid paidbah, kiba bun ki paidbah ki la ai ka jingïatrei lang naduh ki samla, ki longkmie, ki longkpa bad ki riew rangbah ka thaiñ Nongpoh bad la sakhi ruh ba ka sor Nongpoh ka la kynjah jar ha kaba shi bynta ban ïa snoh kti lang ha kane ka jingaid paidba ban pynrem ïa utei u runar ki nongshong dukan ki la khang khyrdep ïa ki dukan bad ka iew ka hat kam don shuh shi bynta ba ki paidbah ki ïa snoh kti lang ban pynrem ïa utei u runar bad u riew thrang snam uba la nud ban pynïap ïa katei ka samla kaba la duh ïa la ka jingim ha ki kti runar utei u bar jylla.