Shillong, Naiwieng 1: U Myntri Rangbah ka jylla u Conrad K Sangma ha ka sngi Saitjaiñ u la ïakynduh ïa u Secretary ka tnad Ministry of Road Transport and Highways (MoRTH) ban ïakren halor ki kam maramot ïa ka surokbah National Highway 217.
Ha ka post halor ka X, u Sangma u la ong, “La don ka jingïakynduh bad u Secretary @MORTHIndia ryngkat u Deputy CM I/c PWD, u Bah Prestone Tynsong ban ïakren halor ki kam maramot ïa ka surok NH217.Khublei ïa ka jingkyrshan jong ka Tnad ban pynïar shuh shuh ïa ki jingtei ha Meghalaya.”
Ha kane ka sngi la ïa don lang ruh u Deputy Chief Minister in-charge ka tnad PWD u Bah Prestone Tynsong ha kane ka jingialang.
Ka NH-217, kaba pyniasoh ïa ki bynta jong ka South Garo Hills bad West Garo Hills sha Assam, ka la donkam ban maramot kyrkieh, ha kaba ki nongleit nongwan bad ki nongkit mar ki la pynpaw ïa ka jingsngewkhia halor ka jinglong jingman jong ka, khamtam ha ka por lyiur.
