Kynduh lang ki samla Karbi ha ka tamasa jong ka AMKA ha Purdiwa

0

Nongpoh, Risaw 06: Kum shi bynta ban lum ban lang ïa ki khun samla Karbi bad ban wan rah ruh ïa ka jingïatylli hadpeng paid Karbi kiba shong basah ha ka jylla Meghalaya, Ka All Meghalaya Karbi Association ha ka 4 tarik u Risaw 2022 ka la pynlong ïa ka jingïakynduh lang jong baroh ki samla Karbi na Meghalaya ba la tip kum ‘ Karbi Youth Festival’ kaba dei na ka Meghalaya Zone ha ka Shnong Purduwa ha Ri Bhoi District.
Ka All Meghalaya Karbi Association kala pynlong daka lympung “Karbi Youth Festival Meghalaya Zone” ha kaba kane ka lympung ka la sdang naduh ka 3 tarik Risaw 2022 bad la pynkut haka 4 Tarik Risaw 2022 ba la wan shim bynta shitrhem da ki khun samla Karbi na ki bynta bapher bapher jong ka jylla Meghalaya.
Kane ka dei ruh ka tamasa jong ki khun samla Karbi ha Meghalaya bad ka thong hi ka long ban lum lang ïa ki khun samla Karbi ba kin don ka jingkitkhlieh ban trei na ka bynta ka bha ka miat ki paid Karbi bad kumjuh ruh ba kin bud ïa ki dienjat ba la ïalam da longshuwa man shuwa ban pynneh ïa la ki riti ki dustur badka jinglong tynrai ki jaid bynriew Karbi.
Ha kane ka tamasa la wan shim bynta lang ruh da u MLA ka Nongpoh, u Bah Mayral Born Syiem kum u kongsan bad ka Kong Macdalyne Mawlong, MDC ka Umsning kum ka symbut kongsan bad la sakhi lang ruh da ka jingdon lang ki riew rangbah ka jaid bynriew Karbi bad ki nongïalam seng bhalang na Ri Bhoi ba kynthup ïa u u Bah Ferdinald Kharkamni, President ka KSU North Khasi Hills District, U Bah Jayson Lenox Nongrum, President ka HYC Ri Bhoi District, bad U Samson Teron President Ka Karbi Student Association.
U General Secretary ka AMKA, U Bah Bistocan Timung, u la ïathuh ka jingthmu jong ka seng ban pynlong ïakane kane ka tamasa ka dei hi naka bynta ban teh rasong ïaki khun samla Karbi kiba don hapoh Jylla Meghalaya naka bynta ban pynkynmaw bad ban hikai ïa ki kumno ban pynneh pynsah bad ri syndong ïaka riti ka dustur lajong kaba la hikai bad bala buh daki long shwa manshwa jong ka jaidbynriew.
La ïathuh ruh ba haka jingshisha haka ri india hi baroh kawei kan dei ka sien Laiphew jong ka jingrakhe ïakane ka tamasa jong ki khun samla Karbi, hynrei ha Meghalaya ka dei ka sien kaba nyngkong ban rakhe ïa kane ka tamasa ha kaba baroh ki 12 tylli ki unit jong ka AMKA kiba don hapoh ka jylla Meghalaya kila ïa poi ban ïashim bynta hakatei ka lympung.
Na ka liang u Bah Mayral Born Syiem, MLA ka Nongpoh kum u kongsan bad ka Kong Machdalyne Mawlong, MDC ka Umsning kum ka symbut kongsan, haba kren ha kane ka sngi ki la pynpaw ka jingkmen ban ïa don bynta lang ha kane ka tamasa bad ki kyntu ruh ïa ki khun samla ka jaid bynriew bapher bapher ba ki dei ban don ka jingïatylli ban pynneh pynsah ïa ka riti dustur bad ka jinglong tynrai ka jaid bynriew.

Leave A Reply

Your email address will not be published.