Kynduh ka HYC ïa ki heh ophisar ka tnat pule puthi ba pynslem ia ka Scholarship ki khynnah pule

Shillong, Rymphang 17: Ka Hynñiewtrep Youths’ Council (HYC) Education cell ka la leit ban ïa kynduh bad ki ophisar jong ka tnad Pule puthi ka sorkar jylla hapoh secreteriat.
Kane ka jingleit jong ka seng ka long hadien ba ka tnad Pule puthi ka sorkar jylla lyngba u Secretary bad Commissioner ka tnad Pule puthi ka sorkar jylla, u la khot ïakren ïa ki nongïalam jong ka seng ïa kaba la pynlong hapoh ka conference hall jong ka secretariat ha ka jingdon ryngkat lang kiwei ki ophisar, hadien ba ki dkhot jong ka seng ki la leit ban khang ta la ïa ka ophis treikam jong ka Directorate of Higher and Technical Education, halor ka mat jong ka jingsahkut bad ka jingpynslem ban pynlait mardor ïa ka 3rd installment jong Pre bad ka Post matric scholarship kaba hap hapoh ka Umbrella Scheme na ka bynta ki khynnah pule ka Jylla.
Ka seng ha kane ka jingïakynduh ïa ki ophisar ka pule puthi ka sorkar jylla, ka la buh ruh ïa ki 2 tylli ki mat jingdawa ha khmat ka sorkar , kata ka long ban dawa ïa ka tnad Pule puthi ka sorkar ban pynkloi ïa ka jing submit ïa ka Utilization Certificate halor ka jingpyndonkam ïa ka pisa Scholarship kaba la sam sha ki khynnah pule hapoh u bnai Nailur jong man u snem sha ka ministry of Education bad kumjuh ruh ban thaw ïa ka cell la ka jong kaba yn peit thik tang ïa ki kam kiba ïadei bad ka jingpynlait ïa ka scholarship jong ki khynnah pule ka jylla. Na ka liang ka sorkar lyngba u Commissioner and Secretary of Education, u la mynjur bad pdiang ïa kine ki mat jingdawa jong ka seng bad u la kular ruh ba ka sorkar kan shim ïa ki lad ki lynti ban ïakren bad ka ministry of education ka sorkar India ban pynlait noh mardor ïa ka 3rd installment jong ka Pre bad Post matric scholarship jong ki khynnah pule ka Jylla kaba dang sahteng haduh mynta.
Shuh shuh na ka liang ka sorkar ka la kular ban shim ïa ki seiñjam ban pyntikna ba ka jingeh jong ki khynnah pule ha kaba ïadei bad ka jingïoh ïa ka scholarship ka jong ki kan nym bteng shuh ha ki snem ban wan bad ban pynlait ïa ki scholarship ha ka por kaba biang.