Nongstoiñ, Jymmang 16: Ki shnong ki thaw kiba don hapoh ka thaiñ Umyiap Nongstoiñ, ki la ïoh ban mad shisha ïa ka jingkyrkhu ha kine ki khyndiat snem, hadien ba u MLA ka thaiñ u Bah Macmillan Byrsat, u la trei shitom ban buddien bad pynurlong ïa ki surok kiba pynïasoh sha kito ki shnong, kiba la mad shisha ïa ka kordit ha ka kit ka bah, ka ïaid ka ieng bad khamtam ha ka shitom shipa.
Ki Shnong ki bym ju ïohi surok rong mynno mynno ruh, hynrei mynta pat ki la sdang ban ïohi ïa ka jingkyrmen ha kaba ka jingpyntrei ïa kine ki surok ruh ka la ïaid shait shait bad bun ruh kiba la dep.
Kine ki surok ki kynthup ïa ka surok na Nongstoiñ sha Mawkawah, na Mawkawah-Nongrangoi shaduh Umyiap, na Mawïalang Health sub centre sha ïing mane Presbyterian Umyiap, na Sohpian-Domkohsam sha Nongdiwah, na Shohphria sha Lawrapha, na Mawbroi-Mawïawet shaduh madan Riewblei bad kiwei kiwei ki surok kiba pynïasoh sha ki shnong ki thaw jong katei ka thaiñ.
Na ka liang jong ki paidbah nongshong shnong ka thaiñ Umyiap ki la pynpaw ka jingsngewnguh ïa ka sorkar, khamtam ïa u MLA ka Nongstoiñ u Bah Macmillan Byrsat, u ba la shimkhia ban wanrah ïa kine ki surok hapoh ka dong ka thaiñ, kaba la ïarap shisha ïa ki paidbah ha kiba bun ki liang, khamtam ïa ki nongrep ba kin pynpoi ïa ki mar rep sha ki iew ki hat.
U bah Mardingstar Marngar, Secretary Shnong ka Lawrapha u la ong, “Ha kine ki snem ba la dep ngi la mad shisha ïa ka jingeh ha ka liang ka ïaid ka ieng bad ka kit ka bah. Bunsien lada jia ka pang ka shitom ki kali kim lait ban wan bad ngi hap ban pynkit hi da ka met ïa ki nongpang haduh ban da poi ha surok bah”.
“Hynrei mynta naduh ba ngi la ïoh ïa kane ka surok ngi la suk shibun namar ki kali ki la lah ban poi haduh kyrpong ïing. Ki nongrep ruh ki la suk shibun ban kit ïa ki mar rep jong ki khamtam ha kane ka thaiñ ba ki nongshong shnong kiba bun ki dei tang ki nongrep”, u la ong bad bynrap, “Kum ki nongshong shnong ngim lah ban khlem da sngewnguh ïa ka sorkar bad ïa u MLA, u ba la shim ïa ka jingkitkhlieh ban pynïoh ïa kine ki surok kiba la long shisha ki jingkyrkhu ïa ki paidbah”.
Katba ba ka liang u samla Olivertwis Marngar samla napoh ka shnong Umyiap, u la ïathuh ba ki don ki khep kiba ki longkmie ba ar met, ki la hap ban ïakynduh ïa ka jingsngewsih bad duh ruh ïa ki mynsiem ba kordor, tang namar ka jingslem ban poi sha ki jaka sumar namar ka jingbym lait kali.
U la ong ba ka sorkar ka la mang ban shna surok ïa kane ka thaiñ naduh ki phew snem ba la dep. Hynrei ym shym la don ba shimkhia bad kane ka surok ka la shu sah khongreng bad buh ruh ïa ki paidbah ha ka jingjar sat.
“Dei hadien u snem 2018 ba ngi la ïohi ba ka tnad PWD lyngba ka jingbuddien jong u MLA ba mynta, ha kaba ka la mang pisa biang bad mynta ngi sakhi ba ki surok ha kylleng ka thaiñ jong ngi ki la kylla dur. Mynta ngim khuslai shuh ban leit ban wan ha kano kano ka por ruh namar ka surok ka la biang”, u la ong.
