Shillong, Nailur 08: Ka Border Security Force (BSF) ka la pynlong ïa ka Pension Adalat na ka bynta ban pynbeit mar mar ïa kiba jingeh ha kaba ïadei bad ka jingïoh pension jong ki BSF ba la shongthait bad ki longïing kiba don kiba la shongthait bad kiba dei na ka jylla Meghalaya bad Assam.
La pynmih ïa katei ka Pension Adalat lem bad ka jingthmu ban pynïoh ïa ka pension bad kiwei kiwei ïa ka rynsan ba suk ban rung lane ban pyndonkam na ka bynta ban pynsngew bad ban buh ïa ki jingud lane ki jingeh ba ïadei bad ka pension hakhmat ki bor ba dei peit bad ban pynsuk ïa ka jingshna lane ka jingpynbeit ïa ki da kaba kloi. Ka don ka jingthmu ruh ban pynthikna ba ki jingud bad ki mat ba kongsan jong kiba la shongthait kan treikam mar mar ha ka por ba biang bad ka rukom kaba dei.
Yn pynlong da ka prokram ha ka 11 tarik Nailur 2026 ha ka por 9:30 mynstep ha BSF Camp, Mawpat, Shillong bad ki nongïashim bynta ki long ki BSF Pensioners bad ki Family Pensioners na ka jylla Meghalaya bad Assam bad ka jingthmu ka long ban pynbeit hangto hangto ïa ki jingeh bad jingud jong kiba dei ban ïoh ïa ka pension lane bai bam tymmen.
Ha ka por ba don ka Pension Adalat, ki nongïoh pension bad ki ïing ban ïoh pension kin ïoh ka lad ban pynpaw ki jingeh jong ki ha kaba ïadei bad ka pension bad kiwei kiwei ki jingïoh jingmyntoi na ka bor ba dei peit. Yn sa shimkhia haba la dep ïoh ïa ki jingujor ba la pdiang, da kaba kynjoh thong ban pynbeit ïa ki jingeh syndon ha kajuh ka jaka, katba lah khamtam.
Ka Pension Adalat kan sa pynïoh jingmyntoi ruh lem bad ka pynshai halor ki lad ki lynti, ki rukom treikam bad ki kabu ba lah ban pyndonkam ha ka ban pynbeit ïa ki jingmudui bad ki jingshitom ba ïadei bad ka pension.
Kane ka sienjam ka pyni ïa ka jingkut jingmut bad ka jingkitkhlieh jong ka Border Security Force (BSF) na ka bynta ka bhalang jong ki nongïoh pension bad ki pension longïing. Ka thmu ban pynbiang ïa ki ïa ka jingshakri bad ka rynsan ba kyrpang kaba suk ban ïoh da ka thong ban pynbeit ïa ki jingkhuslai ne jingujor bad ki jingshitom kiba shisha jong ki.
Na ka liang jong ka Border Security Force, ka la kyrpad ïa baroh ki BSF Pensioners bad ki Family Pensioners ka jylla Meghalaya bad Assam ba kin shim ïa kane ka kabu ksiar bad ïashim bynta ha ka Pension Adalat na ka bynta ban pynpaw ki jingeh kiba ïadei bad ka jingïoh pension bad kiwei kiwei ki mat ba kongsan.
