Kwah jingshai ki paidbah khappud lano yn sdang noh ban ïa pynbeit ïa ka Langpih Sector

Nongstoiñ, Naitung, 30: Ka jingpynslem jong ka sorkar ban leit jurip ïa ki jaka bad ki shnong ki thaw kiba hap ha ka Langpih sector, na ka bynta ban ïa pynbeit noh bad ka sorkar Assam, ka la pynpisa jingmut haduh katta katta ïa ki paitbah kiba shong ha ki shnong kiba don ha katei ka thaiñ.
Ha kine ki khyndiat sngi la ïoh ban ïa kren bad ki rangbah katei ka thaiñ ha kaba ki la pynpaw ïa ka jingsngewkhia, namar lai taiew mynshuwa ka Regional Committee on Border Dispute kaba dei peit ïa ka West Khasi Hills kaba la khlieh da u bah Paul Lyngdoh Myntri sorkar, ka la dep lum ïa ki rangbah shnong khappud bad ki sengbhalang ka West Khasi Hills ha Nongstoiñ, ban ïathir halor katei ka kam, ha kaba na ka liang u bah Paul Lyngdoh u la kren da kaba shai ba hadien khyndiat sngi, kin sa leit ban jurip ïa ki shnong ki thaw bad ki jaka khappud kiba hap ha ka Langpih sector.
Kitei ki rangbah ki la kyntu ruh ba ka Regional Committee ka dei ban pynshai noh kloi katba lah bad ban pyntip ruh lano kin wan bad hangno kin khot lang ïa ki paitbah nongshong shnong. U bah P.Nong-shlong sordar shnong Mawïamsyiem u la ong ba ka jingpynslem jong ka Regional Committee ban wan jurip ha khappud Langpih sector, imat kan ym lah ban urlong mynta u snem.
Lada ym lah ban pyndep mynta u snem kan sahteng shuh shuh, namar ba ha u snem ban wan ka Election MP ka la long bad naduh ki bnai Nohprah ter ter, ki heh sorkar na Assam bad na Meghalaya kin ym don por shuh ban leit ïakren ne ïapyrkhat ïa ki kam pynbeit pud namar kin bun kam ha ka jingleit ïalap Election. Nalor kata u la ong ruh ba ha Meghalaya lei lei ki don ar tylli ki election kata ka MP bad MDC bad kan ktah bha ïa ka por jong ki heh sorkar.
Kawei pat ka tyllong khubor ba la ïoh lum na ka thaiñ Langpih, la ong ba ha ka taïew ba la dep ka Regional Committee on Border Dispute jong ka Assam, ka la pynlong ïa ka jingïakynduh lang ïa ki Sengbhalang, ki riew rangbah bad ki heh sorkar ha Boko na ka bynta ban ïakren halor katei ka mat pynbeit pud ha Langpih sector.
La ong ruh ba ha katei ka jingïakynduh lang, ki sengbhalang na Assam kum ka Rabha Hasong Autonomous Council, All Rabha Student Union, Gurkha Student Organisation bad kiwei wei ki la ïadon lang.
Nalor kata la ong ruh ba na ka liang ki nongïalam jong ki Nepali na Upper Lumpee bad Lower Lumpee, ba la ïalam da u Dombar Bahadur Bhatarai (Domare) u Biju Chetri bad kiwei kiwei ki rangbah Nepalee, ki la leit ban ïashimbynta lang ha katei ka jingïalang.
Ki thymmei khubor ki ïathuh ruh ba kaba wat na ka liang ki Garo kiba shong ha ki shnong khappud naduh Dronpara, Nawapara, Bangjeng, Mawïamsyiem bad kiwei kiwei, ki la leit ban ïadonlang ha katei ka jingïalang ban ai jingkyrshan ïa ka sorkar Assam bad ban pynshai ba ki kwah ban don beit ha Assam ym ha Meghalaya.
La ong ruh ba katei ka jingleit ai jingkyrshan jong ki Garo ïa ka sorkar Assam, ka la pynkmen ïa ki Nepali baroh kiba shong ha ka thaiñ Langpih bad ki la kyrmen beit triang ba naduh Mawsikar, baroh ki jaka kiba shaphang mihngi na ka surok haduh ka jaka ba don ka ktem pulit Assam ha Langpih kaba dei ka jaka ïew ba rim ki la dei lypa ki jong ka Assam.
Ki la pynpaw ruh ba ki bynta jong ka Meghalaya pat ki dei tang na shilliang kata naduh ka madan shaphang sepngi. La ong ruh ba lada ka jingpynbeit pud kan dang sahteng kham slem ki paitbah kin dang mad biang shibun ki jingeh.