Nongstoiñ, Naitung, 30: Kum shi bynta ban rakhe leh kmen ïa ka jingkynjoh jong u Mawmer ba 25 snem, ka Siejlieh Sport Social & Cultural Youth Organisation ha ka sngi saitjain, ka la ïoh ban pynkut noh ïa ka lympung jong ka jingïakop pyni sap kyrpang kaba la tip ruh kum ka ‘Talent Show’ ïa kaba la pynlong ha Dorbar Hall shnong Siejlieh Nongstoiñ.
Ka jingrakhe ïa katei ka Jubili Rupa la sdang naduh ka 15 tarik u Nailar 2022 baroh shi snem bad la ong ba yn pynkut ruh ha ka 15 u bnai ban wan kata ha u Nailar 2023 kum ka dak jong ka jingpynhap pyrda ïa ka jinglehkmen na ka bynta ka Jubili Rupa jong ka Club.
Ïa katei ka sngi kyrpang ka club ka la pynlong ïa ki jingpynbyrngia ki bapher bapher kum ki jingïalehkai kynjat bol, Badminton, Carrom board, Volleyball, Basketball, ki jingshad, ki jingrwai bad kiwei kiwei.
Ïa ka nam lahduh ha katei ka sngi pyni sap, la ïoh ban rah da u Aibanjop Marweiñ kum u ba long ba nyngkong, u ba la pyni ïa ka jingleh Jadu. La ïadonlang ha kane ka sngi da u bah G.W. Nonglang President ka Club, u samla Gerald Ïawphniaw, ka samla Pynsuk Thongni, ka samla Grace Lyngdoh kiba dei ki nongrwai ba pawnam ka thaiñ. Kitei ki samla ha kajuh ka por kiba la long ruh kum ki nongbishar ki la ïoh ban sam ïa ki khusnam bad ïa ki Syrnod sha ki nongjop ha katei ka sngi.
