Shillong, Ïaïong 27: Ïa ka Forgotten Folklore Project (TFFP) Fellowship, kaba la plie da ka Sauramandala Foundation, ka la kut noh da ka grand graduation bad ka jingpyllait ïa ka kot kaba la long ha Crystal Hall, Vivanta, Shillong.
Kane ka prokram ka la kut da kaba pynlong ïa ka fellowship program kaba 6 bnai, kaba la wanrah lang ïa 15 ki dkhot bad 7 ngut ki Freelance illustrator na ki 7 tylli ki jylla kane ka thaiñ shatei lammihngi, kaba kynthup ïa ka jylla Arunachal Pradesh, Assam, Manipur, Mizoram, Nagaland, Sikkim, bad ka jylla Tripura.
Kine ki dkhot ki la pynwandur ïa ki 20 tylli ki kot ïathuh khana jong ki khynnah, da kaba pynneh tyngkai bad ban pyrkhat biang ïa ki khana jong ka jinghiar pateng kiba donlang bad ki kolshor bad ka jingban jur halor ka Early Childhood Development (ECD).
Haba kren ha kane ka prokram kum u kongsan u Myntri ka tnat Pule Puthi u Rakkam A Sangma u la ong, “Nga sngewkmen ban don bynta lang ha kane ka jingrakhe kaba khraw. Nga ngeit ba ka dei ban don ka jingkmen ha manla iwei pa iwei na ngi ka ban ïalam ïa ngi sha ka kam kaba bha manla ka sngi. Kane ka project ka long kawei ka nuksa halor kane ka jingsngewkmen.”
Katba u Sameer Sishodia, CEO Rainmatter Foundation u la ong, “Na ka bynta kano kano ka jingleh halor ka jingkylla ka suiñ bneng ne ki policy ngi ïaid lait ban shim kam kloi. Ngi donkam ban sngewthuh ïa ka jaka bad ïa ki briew khambha ha shwa ba ngin leh eiei ïa kano kano ka kam. Ki sienjam ba kum kine ki long kiba donkam ban leh ïa ka. Ki khana ki ïarap ïa ngi ban sngewthuh ïa ka jaka, ki briew jong ka bad ka khana pateng.”
Katba u Namratha Bhat, Educator bad Product Lead ha ka Key Education Foundation u la ong, “Haba thoh ïa ka handbook, donkam ka jingpyrshang kaba rit ba dei ban buh bad ban thoh ïa kine ki kot TFFP.”
Ka Forgotten Folklore Project (TFFP) Fellowship ka dei ka jingpynwandur kaba 6 bnai haba ïadei bad ka jingthoh ïa ka kolshor bad kumjuh ruh ka jingdonkam ban tyngkai ban pynneh pynsah ïa ka ktien jong ki jylla kane ka thaiñ shatei lammihngi lyngba ka thoh ka tar kaba la leh da ki khynnah.
Hadien ba la pyllait da ka Sauramandala Foundation ha u snem 2024 bad kaba la kyrshan da ka The/Nudge Institute hapoh ka jingïatreilang bad ka Story Weaver by Pratham Books, na ka liang ka fellowship ka la thaw hapoh kine ki ar snem ïa ki kam kiba wanrah jingmyntoi ïa ka Meghalaya ba kan lah ban pynïar sha ki 7 tylli ki jylla kane ka thaiñ shatei lammihngi ba kynthup ïa ka jylla Arunachal Pradesh, Assam, Manipur, Mizoram, Nagaland, Sikkim, bad Tripura.
Haba pynpaw ka jingngeit ba ka jingpule puthi naduh ba dang khynnah dei ban ai mynsiem, ba kynthup ruh ïa ki rukom pyrkhat ha ki kam kolshor bad ki rukom pyrkhat, na ka liang ka TFFP Fellowship ka la wanrah lang ïa ki nongthoh na kylleng ka thaiñ ban thoh ki kot ïathuh khana ki ban ai mynsiem ruh ïa ki rukom leh da ki nongshong shnong, kum ka folklore, bad ka jingstad jong ka kynhun jaitbynriew. Kine ki khana ki thmu ruh ban pynktik ïa ka jingkwah ban tip, ban rakhe ïa ka jingithuh bad ban kynduh ïa ki jingdonkam ka Early Childhood Development (ECD) lyngba ka jingdon bynta ha kiba bun ki rukom kiba ïadei bad ki kam ïathuh khana.
Ha ka snem 2024-25, ka fellowship ka la wanrah ïa 15 ngut ki dkhot bad 7 ngut ki artist, kiba la ïatreilang ban wanrah biang ïa 20 tylli ki storybook halor ka nongrim ki jingïathuh khana na la ki jong ki shnong ki thaw, kine ki khana ki ïaid pateng la pateng hynrei ki duna bha pat ki ban buh record. Kine ki kot ki long kiba riewspah naba ki don ki jingtip ba bniah halor ka kolshor bad kidei ruh kiba don jingmut.
La ong ba ki dkhot ki ïoh ka jingkyrshan pisa kumba T. 25,000 na ka bynta jong baroh ka prokram. Naba kane ka fellowship ka la kut noh, ïa kane ka prokram la rakhe da ka grand graduation bad ka jingpyllait ïa ka kot hapoh ka Crystal Hall, Vivanta, Shillong ha ka on 26 tarik mynta u bnai.
