Khliehriat, Nailar, 22: Ka kynhun Anti Narcotic Task Force (ANTF) jong ka East Jaiñtia Hills District ryngkat ka jingïatreilang bad ki Pulit ka Umkiang, ha ka step sngi Palei ki la ïoh ban kurup ïa u drok heroin uba khia 79.81 grams na Ratacherra bad kem ruh ïa uwei u briew uba donkti ïa uba la tip kyrteng kum u Md Siraj Ali 36 snem rta uba shong basah ha Forest Colony Polo, Shillong.
U Superintendent of Police jong ka East Jaiñtia Hills District ha u kyrwoh u pyntip ba ka kynhun ki Pulit ka ANTF ha ka por kumba 4:00 baje mynstep ryngkat bad ki Pulit jong ka Umkiang ki la pynlong ïa ka jingtalasi ïa ki kali ha Ratachera, East Jaiñtia Hills District da ka jingthmu ban khanglad ïa ka jingwan rung beaiñ ki briew kiba nabar hadien ba ki la ïoh bat ïa kawei ka Bus Night Super kaba don ïa u nombar AS12E 6399 kaba wan napoh Silchar.
Ha ka jingtalasi ki Pulit ki la ïoh ban kurup hynñiew tylli ki synduk thep sabon na uwei u nongleit jingleit bad ha ka jingtohkit la lap ba u dei u drok heroin uba don ïa ka jingkhia kaba 79.81 gram. Hadien kane ki Pulit ki la kem noh ïa une u briew bad pyngngat hapoh ki kyndon jong ka NDPS Act bad ka jingtohkit ïa une u briew ka dang ïaid shakhmat ban lapdien shuh shuh ïa kiwei pat kiba donkti.
