Shillong, Nailar 22: Ka tnat MeECL ha ka sngi Palei dang step phyrngap ka la hap ban pynlait noh ïa ka um napoh Dam Umïam, Ri Bhoi District hadien ba katei ka dam ka la dap bad lah jan shlei ka um naduh ka mied jong ka Sngi Balang.
Ia kane lah ban ong ba kadei ha ka sien kaba nyngkong ba ki bor pynïaid jong ka MeECL ba kan ïoh ban pyllait ïa ka um na kane ka pung Umïam Damsite kata ruh dang ha u bnai Nailar.
Ka jingjur u slap mynta la kumba 7 sngi tam haduh une u bnai Nailar ka la long kaba la palat, hynrei ym pat lah pat ban batai sa katno sien ka MeECL kan ïoh ka lad ban pyllait biang ïa ka um na katei ka pung.
La ong ba lada ka jingther u slap kan dang ïaibteng ha kine ki bnai ban wan lehse ka tnat ba dei peit kan sa hap ban pyllait biang ïa ka um napoh Dam Umïam.
Shuh shuh lah ban pynkynmaw ba Deputy Commissioner jong ka Ri Bhoi District ba dei ruh shongknor jong ka District Disaster Management Agency la pynbna paidbah ha ka Sngi Balang ba ka pung Umïam ka la dap, la bthah ïa ki briew kiba sah harud wah lada pynlait ïa ka um ba kin long kiba husiar.
La pyntip ba ka um ha pung Umïam ka la kot sha ka 3209.68 phut bad ïa ka um lah ban pynlait ha kano kano ka por lada ka jingslap ka dang ïai bteng kumba ka long mynta, kumta la bthah ïa kiba shong basah harud wah kin long husiar namar lah ban pynlait ïa ka um.
La kyntu ïa ki paidbah ba kin long husiar ba lada don ka jingshlei um kim dei ban leit shajan, kim dei ban don hajan ki wah na ki shnong bad ki jaka ba ïaid ki sainar bording khnang ban lait na kitei ki jingma.
