Shillong Nailar 22: Ka khubor ba la ïoh na ki pulit la ïathuh ba u Motilal Jogi u la phah ka jingujor ba ha ka 18 tarik mynta u bnai ha ka por kumba 1 baje mynstep, ki runar bym lah ban ithuh ki la prong hapoh ka godown jong u kaba ha Shnong Soo kilo (EJH) bad ki la tuh ïa ki tiar kiba shongdor kumba T. 1,25,466/-.
Ha kawei pat ka jingjia ki pulit ki la ïathuh ba u SI Predeep Chakraborty jong ka 4th Bn., BSF, BOP SP-Tilla (WJH) u la phah ka jingujor ba ha ka 19 tarik mynta u bnai ha ka por kumba 12.10 baje nohphaisngi, hadien ka jingtip kaba thikna ki BSF ki la ïoh ban khang kdong ïa kawei ka kali Tata Sumo ha BOP gate bad ki la ïoh bat ïa 3 ngut ki nong Bangladesh bad 3 ngut ki nong India kynthup ïa u nongñiah hynrei kine kim shym la lah ban pyni ïa ki kot ki sla kiba dei ne ki sakhi ba biang ba kin pynithuh ïalade.
Ka khubor ba la ïoh na ki pulit la ïathuh ba u Sangam Singh u la phah ka jingujor ba ha ka 18 tarik mynta u bnai ha ka por kumba 7.30 baje mynmied u la shem ba ki runar bym lah ban ithuh ki la prong hapoh ka ïing jong u kaba ha Harijan Colony, Punjabi Lane, Ïewduh, Shillong bad ki la tuh u jingdeng ksiar ba shongdor kumba T. 1.5 lak bad ka pisa kumba T. 10,000/-.
Ha kawei pat ka jingjia ki pulit ki la ïathuh ba ha ka 18 tarik mynta u bnai ha ka por kumba 10.30 baje mynstep uwei u Modir M Sangma u la aiti ïalade ha ki pulit kaba ha Shallang PS (WKH) bad ïathuh ba u la tied ïa uwei u kyrteng u Jotin Deka (55 yrs) da u nar rod ha ka shnong Dassar (WKH). Kham hadien ki pulit ki la pynkit noh ïa u Jotin Deka sha PHC Shallang, ha kaba nangtei la phah noh sha CHC Riangdo.
