Shillong, Nailar 22 : U Nongïalam ka Liang Pyrshah ka Iing Dorbar Thawaiñ ka Jylla, Bah Ronnie V Lyngdoh u la ong ba ka shong mynta ha ka bor jong u Lamphang ka Iing Dorbar, u Thomas A Sangma ban rai halor ka kam Nongïalam ka Liang Pyrshah ha Iing Dorbar.
Haba kren bad ki lad pathai khubor shisngi shwa ban sdang ka Dorbar Synrai, u Bah Ronnie u la ong, “Ka bor mynta ka shong ha u Lamphang kumno ban leh katkum ki kyndon. U Bah Ronnie u la ïathuh ruh ba un sa kynduh ïa u Lamphang ha kane ka sngi Thohdieng haba ïadei bad kane ka kam.
Katei ka jingkren jong u Nongïalam ka Liang Pyrshah kadei hadien ba lai ngut ki MLA jong ka Congress ki la pynïasoh noh sha ka NPP bad kane ka la pynlong ïa ka Congress ban sah sa tang uwei u MLA.
“Nga lah ban iehnoh dalade lane u (Lamphang) u lah ban shim kano kano ka rai,” u la bynrap shuh shuh.
Haba kylli hato ka Trinamool Congress bad ka Congress kin ïatreilang ne em ban pynneh ïa ka shuki Nongïalam ka Liang Pyrshah, une u MLA ka Mylliem u la ong ba ïa ka rai un ieh ha ka party la ha ka jylla bad kumjuh ruh ha ki nongïalam ha ka Ri.
“Lada ka AICC ka ong ba phi ïatreilang bad ka TMC ngin leh kumta bad lada ka AICC kam ai kano kano ka jingbthah, kumta, kam don kano kano ka jingïatreilang ha Iing Dorbar,” u la bynrap biang.
Kumba long haduh mynta hi, ka TMC ka don san ngut ki MLA, ka VPP saw ngut bad ka Congress uwei.
