Ha Meghalaya ki Chairman bad dkhot MPSC dei kiba shah thung ha ki riew saiñ pyrthei, ong ka KSU

Shillong, Nailar 22: Ka Employment Monitoring Cell jong ka Khasi Students’ Union hadien ba ka la dep buh ïa dorkhas hakhmat u Myntri Rangbah jong ka jylla u Conrad K Sangma halor ban wanrah ïa ka jingkylla ïa ka rukom treikam jong ka MPSC kaba la jyrsieh ha ka rukom thungkam thungjam, ka la leit ruh ban buh ïa 20 tylli ki mat jingdawa ban saiñdur bad pynbha ïa ka rukom treikam ha ka MPSC.
Ka Seng ka la pyntip pat ba lashai ka sngi ruh kan ai ïa kane ka dorkhas sha baroh ki seng saiñ pyrthei (political parties) jong ka jylla bad ki 59 ngut ki MLA khnang ba kin dup lah ban ïathir ïamir halor kine ki mat jong ka MPSC ha ka assembly session ka ban sa wan, ong u Reuben Najiar Chairman, Employment Monitoring Cell Khasi Students’ Union.
Ha kawei pat ka liang utei u nongïalam ka seng ha jingïakynduh bad ki lad pathai khubor u la ong ba hadien ba la ai ïa ki dorkhas ka seng ka la ai ruh ïa ki kot ki sla bapher bapher ha kaba ka sorkar kan lah ban pynkhreh bad ba kan sngewthuh ba ka jingdawa jong ka seng kam dei ka jingdawa kaba tang ha ka lyer hynrei ha ryngkat bad ki sakhi sabut.
“Phi ïohi hangne ba ha Mizoram ka Mizoram Public Civil Service Commission u Chairman bad ki dkhot kidei kiba la dep pass ïa ka civil service bad kidei ruh kiba la shong thait, kumjuh ruh ha Manipur bad ha Nagaland ki long kumta hi bad ha jylla jong ngi pat ki Chairman bad ki dkhot ki dei ki briew kiba la shah thung da ki riew seng saiñ pyrthei bad kumta ka seng ka wanrah ïa ki sakhi sabut khnang ba kan pynsuk ïa ka sorkar bad ha kajuh ka por ruh ngi pyndait lang bad ki result ba la pynmih da ka Arunachal Pradesh ha kaba ka rukom pynmih ka la long kaba khuid ba suba ki pynmih ïa ki kyrteng, ki roll number, ka percentage ki marks ha ki personal interview bad written exam, kum kine kiei kiei ka pyni ba kim leh ïa kiei kiei kiba buhrieh hynrei ki la leh da kaba khuid,” ong u Samla Najair.
U la ïathuh ruh ba ha kiwei kiwei ki jylla kino kino ki briew kiba aplai hapoh ki MPSC ki dei ban long kiba tip ïa la ki ktien la jong, katba ha jylla Meghalaya kino kino kiba aplai kidei ban long ki nong India, hynrei ka jingdawa jong ka seng pat ka long ba ha Meghalaya kino kino kiba aplai kidei ban tip ïa ka ktien Khasi ne ktien Garo khnang ba kin lah ban ïakren bad ki paidbah bad ba kin tip ruh ïa ki jingeh ba ki paidbah ki ïakynduh bad ïa kine baroh ka seng ka la pynbiang khnang ba kan pynsuk ïa ka sorkar ban shim ïa kano kano ka jingpynbha ïa ka MPSC.