Khliehriat kyllalyngkot 5: Hadien ka jingïoh jingtip kaba tikna na ki tnat syntiat, ki pulit jong ka Umkiang Patrolling Post, East Jaiñtia Hills District hynnin ka 4 tarik bad mynta ka 5 tarik ki la pynap ktem ïa ki ar tylli ki kali kiba la suba ba ki kit ïa ki drok bad hadien ka jingpynap ktem ki la ïoh ban kurup ïa ki drok bad Kem noh ïa ki snat kiba donkti ha katei ka kam khaïi drok.
Katkum ki khubor na ka tnat pulit la ong ba myn ha ka 4 tarik ha ka por kumba 2.30 nohphai sngi, ki pulit ki la pynap ktem ïa kawei ka trok kaba don ïa u registration number AD-01-DD-7142 ha Damcherra Kuliang, katei ka trok ka la kit dewbilat bad hadien ka jing talasi bniah ki pulit ki la lap haduh 200 cartons ki song ba don ki dawai 100 bitor ki dawai Phensedyl ( banned contraband under NDPS Act) ba la buhrieh bad thep lang hapoh bad ki byrni dewbilat, halor kane ki pulit ki la Kem noh ïa u nongñiah jong katei ka trok uba la tip kyrteng kum u Santosh Patel bad register ejahar ha Lumshnong Police Station bad ka jingtohkit ka dang ïaid.
Shuh shuh, hadien kane, ha ka 5 tarik mynta u bnai lyngba ka jingphla utei u nongñiah trok ki pulit ki la Kem noh sa ïa uwei ruh uba donkti ha ha ka kam khaïi drok uba la tip kyrteng kum u Harendra Singh lem bad ka kali kaba don ïa u registration number NL-01-Q-4830.
Kat haduh mynta ki pulit ki dang pynlong ïa ka jingtohkit ban lap dien shuh shuh ba ka ktem ba khaïi beaiñ ïa ki dawai (contraband) bad ruh ban lap shuh ïa kiba donkti ha kane ka kam khaïi drok beaiñ.
