Kumba 1.60 lak shi bnai ka jingsiew uwei uwei uba bat kam Chairman

Shillong, Lber 01: Wat lada u Myntri Rangbah, u Conrad Sangma daang shen, ju la ong ka jingthungkam Chairman ka sorkar kam da ktah than namar ka lut tang 12 lak shi bnai, hynrei ki kot ki sla kiba la ioh pat ki pynpaw da kumwei pat.
Ka list ki Chairman, ki Co Chairman, ki Deputy Chairman, ki Vice Chairman, ki Director, ki Adviser ka pynpaw ba ki don palat 175 ngut baroh. Kine ki kynthup ia 27 ngut ki Chairman, 43 ngut ki Co Chairman, 53 ngut ki Vice Chairman, 20 ngut ki Deputy Chairman,10 ngut ki Adviser bad 14 ngut ki Director.
Na ka bynta ka jingsiew sha ki, ka sorkar ka la phiah ha kis an tylli ki kyrdan ne ki Category. Kine ki long ki A+, kiba kynthup ïa ki Adviser bad ki Sitting MLA, nangta A kiba kynthup ïa ki Ex- MLA bad Sitting MDC bad ki B bad C Category ba ka aiti ha u Myntri Rangbah ban peit bad pynhap ïano.
Katkum ki kot ki sla kiba la ïoh, la pynpaw ba ki A+ Category ki ioh ka jingsiew kumne, Ka Honororium ki ïoh 20 hajar shi bnai, ka bai umphniang 250 litar shi bnai, ka bai mobil 4 litar shi bnai, ka bai wai kali 15 hajar shi bnai, ka TA/DA 20 hajar shi bnai, bai wai ïing 20 hajar shi bnai, bai ding elektrik 5 hajar shi bnai, bai shan 8500 shi bnai. Nangta ki ïoh ruh ban buh uwei u draibar bad 3 ngut ki nongtrei Grade IV. Nalorkata ki ïoh bai moramot ïing 2 lak tyngka shisien ai, bai shuki bai miej 40 hajar shi snem, bai kot khubor lai tylli bad ar tylli ki Magazine. Nalor kane ruh lada ki pang ki shitom ne kiba haïing hasem jong ki, ki ïoh jingsumar ei ne ka reimbursement hadien ba la mynjur na ka DHS. Lada shu kheiñ antad ka jingïoh ki Politician kiba hap ha ka A+ kan nym duna ïa ka 1.60 lak shi bnai, khlem pat kheiñ ïa ka bai sumar, bai moramot ïing bad bai shuki bai miej.
Kiba hap ha ka Category A pat ki ïoh ka Honororium ki ïoh 15 hajar shi bnai, ka bai umphniang 150 litar shi bnai, ka bai mobil 3 litar shi bnai, ka bai wai kali 12 hajar shi bnai, ka TA/DA 8 hajar shi bnai, bai wai ïing 8 hajar shi bnai, bai ding elektrik 1000 shi bnai, bai sha 2000 shi bnai. Nangta ki ïoh ruh ban buh uwei u draibar bad uwei u nongtrei Grade IV. Kine kim ïoh bai moramot ïing ne bai shuki. Bai kot khubor pat ki ïoh artylli bad Magazine kawei. Nalor kane ruh lada ki pang ki shitom ki ïoh jingsumar ei ne ka reimbursement hadien ba la mynjur na ka DHS. Ka jingsiew ïa kine ruh kan poi la kumno kumno jan shi lak marwei.
Kiba hap ha ka B+ Category ki ïoh ka Honororium ki ïoh 10 hajar shi bnai, ka bai umphniang 100 litar shi bnai, ka bai mobil 2 litar shi bnai, ka bai wai kali 10 hajar shi bnai, ka TA/DA 7 hajar shi bnai, bai wai ïing 8 hajar shi bnai, bai ding elektrik 1000 shi bnai, bai sha 1000 shi bnai. Nangta ki ïoh ruh ban buh uwei u nongtrei Grade IV. Kine kim ïoh bai moramot ïing ne bai shuki. Bai kot khubor pat ki ïoh artylli. Nalor kane ruh lada ki pang ki shitom ki ïoh jingsumar ei ne ka reimbursement hadien ba la mynjur na ka DHS. Ka jingsiew ïa kine ruh kan poi la kumno kumno palat 50 hajar marwei ha ka shi bnai.
Kiba hap ha ka B Category ki ïoh ka Honororium ki ïoh 10 hajar shi bnai, ka bai umphniang 50 litar shi bnai, ka bai mobil 1litar shi bnai, ka bai wai kali 10 hajar shi bnai. Kine kim ïoh TA/DA ne bai wai ïing. Hynrei ki ïoh uwei u nongtrei Grade IV.
Ki C Category pat ki ïoh ka Honorarium 9000 tyngka bad ka bai leit bai wan ruh 9000 tyngka. Lait nangta kim ïoh eiei.