Sohra, Lber 01: Ka Balang Presbyterian Laitryngew, Sohra Presbytery, kan pdiang ïa ka jingïaseng KJP Synod Sepngi naduh ka 7 haduh ka 10 tarik mynta u bnai.
Na ka bynta kane ka jingïaseng kaba shisien shisnem jong ka Synod Sepngi, ka Balang lyngba u Chairman u T.Bn KS Marbañiang bad u Secretary, u T.Bn MK Rymmai, phah ïa kane ka kyrwoh ka ban long kum ka jingbthah na ka bynta ki Dkhot, ki Delegate bad ki riewngeit ki ban wan sha kane ka jingïaseng.
Ka Balang ka ong ba, Ka shnong Laitryngew ka don ha ka lynti Shillong-Sohra bad ka jngai tang 43 kilometers na Shillong. Nangta ka ong ruh ba ka shnong Laitryngew ka long ka shnong kaba khriat. Kumta la kyrpad ïa ki Dkhot bad ki Delegate ba kin sngewbha ban wanrah ïa la ki jong ki jaiñkup thiah.
Kiwei pat ki jingbthah ki long, ba namar ba ka surok Shillong-Sohra ka long tang kawei, la kypad ïa ki nongñiah kali ba kin sngewbha ban pynkohnguh ïa ka jingpynbeit jong ki Traffic Police bad ki Volunteer. Ka kyrpad ia baroh ba kin ym pynïeng kali harud shilynter ka surok na Umtyngngar sha Laitryngew khnang ban lait na ka jingdheng kali.
Na ka bynta ka jingshngaiñ ha ka leit ka wan bad ban lait na ka jingdheng kali, la kyrpad ïa ki ñongñiah kali baroh ban ym ïa pynher stet ïa ki kali, ban nym Overtake bad ban ym kit tam palat (Overload).
Ki nongñiah kali, lada long kaba lah, kin sngewbha ban tah ia ki mobile number jong ki ha ki kali jong ki khnang ban pynsuk ïa ki volunteer.
Ki jaka pynieng kali ki don sawdong jong ka madan ba pynlong jingiaseng bad ki long kiba heh bad kiba kylluid. Kumta phim dei ban don kano kano ka jingkhuslai ha kaban ioh ia ki jaka pynieng kali.
Ki kali kiba poi hapoh ka 10:00 AM ha ka Sngi U Trai, kin rung beit lyngba ka shnong sha ki jaka parking kiba don ha ka lynti ban leit sha Mawdohnud (Laitmawsiang).
Namar kiba bun ki jaka kiba heh phlang, ki nongwan jingïaseng kin sngewbha ban leh sumar ban ym bret pathar ïa ki kyndok, biri/sikret, khnang ban lait na kano kano ka jingpluh ding.
Ki nongwan jingïaseng kin sngewbha ban ym bret pathar ïa ki kot, ki plastic, ki foil song ja bad kiwei kiwei ha shilynter ka surok bad kumjuh ha ki jaka parking bad jaka shong jingïaseng; hynrei ban sumar khuid ia ki sawdong sawkun baroh.
Ki nongwan jingïaseng kin sngewbha ban wanrah bad la ki jingsiang shong na ka bynta ka jingbit jingbiang jong ki hi.
