Shillong, Naiwieng 22: Ka Khun Hynñiewtrep National Awakening Movement (KHNAM) ka la long kaba la khreh ïa ka thup kaba nyngkong na ka bynta ki kyrtong ki ban ïakhun ïa ka elekshon sha ka Khasi Hills Autonomous District Council (KHADC) bad shen kan sa pynbna ïa ki kyrteng jong ki kyrtong jong ka.
Ha kaba ïadei bad kane na ka liang jong u Working President jong ka KHNAM u Bah Thomas Passah u la ïathuh ba ma u ïalade un ïakhun ïa ka elekshon MDC napoh Jaïaw constituency.
Lah ban ong ba kane ka seng riewlum kaba rit kam shym la don ki nongmihkhmat ha KHADC, Jaiñtia Hills ADC ne ha ka ïingdorbar thaw aiñ.
Halor kane na ka liang u Bah Passah u la ong ba ki mat treikam jong ka party kan long halor ka jingpynkylla ïa ka Scheduled Tribe order of 1950 khnang ban ym don kiba pyndonkam bakla da kiwei pat bad ban pynkylla ïa kawei pat ka hukum ban pynthikna ba tang ki trai ri trai muluk ki la shah ba kin thep vote ha ki district council election.
“Ngi la sdang ban pynkhreh ïa ka elekshon naduh ba sdang jong une u snem ban khmih bniah ïa ki kyrtong na kiba bun ki constituency,” u la bynrap.
