Shillong, Naiwieng, 22: Ka National Highways and Infrastructure Development Corporation Limited (NHIDCL) ka la bthah ïa ka M/s Dhar Company kaba pyntrei ïa ka surok Nongjri-Maheshkhola ban maramot biang ïa kane ka surok hadien ba ka Khasi Students Union (KSU) dang shen ha ka jingjurip ka la lap ba kane ka surok ka la jot tang hadien katto katne ba ladep pyntrei.
Ha ka jingïakren bad ki lad pathai khubor ha ka sngi Thohdieng u Bah Disparsing Rani uba long u nongwad RTI u la ïathuh ha ka 26 tarik, Risaw, 2024 hadien ka jingjurip jong ka KSU ka la lap ba ka surok Nongjri-Maheshkhola ka la sniew tang hapoh lai bnai.
“Ka jubab RTI ba la ïoh na ka NHIDCL ka la pyntip ba ka la hukum ïa ka M/s Dhar Company ban maramot biang ïa ka surok ba la sniew,” u la ong.
Katkum ka jubab RTI, la pyntip ba ka jingsiew bai lutksan ïa ka jingshim jaka ban shna ïa ka surok naduh 18 Mer sha Nongjri ka long T.37,85,92,396 klur. “Phin kyndit ban tip ba ki trai khyndew kiba hap hapoh ka Hima Maharam, ki nongshong shnong kim dei ki trai khyndew hynrei ka khyndew ka dei jong ka Hima bad ka dei ka khyndew jong ka Kur Nongjri bad ka kur Syiemiong,” la ïathuh u Bah Rani.
“Ka pisa bai khyndew la siew sha ka Management Board Law Lyngngam Tilla and Pyndengtanglieh. Kane ka dei kaba pynïaid ïa ka pisa. Ki 400 ngut ki nongshong shnong kim dei ki trai jaka. Ka pisa ka ïoh beit ka Hima bad ka Kur.
Ha kaba ïadei bad ka jingthmu jong ka Sorkar ban maramot ïa ki surok ha kylleng ka sor Shillong kaba la mang pisa T. 6,95,38, 296 klur u la ïoh ïa ka jingujor na ki nongniah kali Roller bad ki nongtrei kontrak kim shym la ïoh jingsiew satia la 6 bnai eiei.
U la ïathuh, tang hadien ba la pan ïa ka RTI, ka tnat PWD (Roads) ka la khot biang ïa kine ki nongtrei kontrak ban trei ïa ka kam.
Nalor kata, u la ïathuh ba u la pan jingtip ruh ïa ka kyrteng jong ki kontraktor kiba pyntrei ïa ki surok hadien ba la mih ka jingkynnoh ba ki don ki kontraktor kiba ïoh ïa ka “blind bill”.
“Nangne shakhmat ngan wad thik pa thik ban lap, la ka don neem kum kata ka jingkynnoh khnang ban ïoh ïa ka jingtip kaba bniah kumno la pyntreikam ïa ka pisa ba la mang hynniew klur duna ban maramot ïa ki surok,” la ong u Bah Rani.
