Kum u “Kpa jong ka saiñ pyrthei ba synroplang” ñiew u Lamphang ïa u (L) BB Lyngdoh

Shillong, Nailur 10: U Lamphang jong ka Ïingdorbar Thawaiñ ka Jylla Meghalaya, u Thomas A Sangma, ha ka sngi Palei u la pyllait ïa ka kot shaphang “(L) B. B. Lyngdoh – Ka Jingburom ïa u Nongïalam uba don ka jingïohi jngai bad u Myntri Rangbah barim ka Jylla uba ki jingthmu jong u ki bteng ban pynshlur ïa ki Pateng,” ba la thoh da u Bah Andrews Simon uba dei u Commission and Secretary barim jong ka Meghalaya Legislative Assembly bad mynta kum u Adviser (Legislation).
U (L) B. B. Lyngdoh uba la khlad noh, uba la shakri kum u Myntri Rangbah ka Jylla la saw sien, u la long uwei na ki nongïalam ba pawnam bad uba la noh synñiang shibun sha ka jingkylla bad jingangnud jong ka saiñ hima sima jong ka Jylla.
Haba kren kum u kongsan, u Sangma u la ong ba ka jingim jong u (Late) Lyngdoh ka ïadei bha bad ka jingkylla ha ka saiñ hima sima jong ka Meghalaya, ka jingkylla ha ka synshar paidbah bad ki snem ba dang san.U la batai ïa u kum u nongialam uba don ka jingthmu, u nongmihkhmat uba tbit bad u nongtei ïa ki tnat treikam uba peit ïa ka sain pyrthei kum ka atiar ban ïada ïa ka burom, ka jinglong kyrpang, ka hok bad ka lawei jong ki paidbah.
Haba kdew ia u (L) Lyngdoh kum u “kpa jong ka saiñ pyrthei ba synroplang”, u Lamphang u la ong ba ka jinglah jong u ban pyniasoh lang ïa ki seng sain pyrthei bapher bapher bad ban ai ïa ka jingsynshar kaba skhem ka long ka jingjop kaba kongsan, khamtam ha ka por ba don ka jingbym shong shngain ha ka sain pyrthei bad shwa ban wanrah ïa ka ain pyrshah ïa ka jingphet seng.
U Sangma u la pynpaw ïa ka jingpyrkhat jong u (L) BB Lyngdoh halor ki mat kiba ïadei bad ki nongshong shnong, kynthup ïa ka jaka, ka kamai kajih, ka jingïadei, ka roi ka par bad ka jingïatylli ha ka imlang sahlang.U la kdew ruh ïa ka jingkyrshan jong u ban buh jingthoh ïa ki jaka ha ka rukom kaba ryntih lyngba ki jingpeit bniah ïa ki jaka, ka jingnoh synniang sha ka jingseng ïa ka NEIGRIHMS bad ka jingpynrung ïa ka MLA Scheme.
U nongthoh jong ka kot u Bah Andrew Simons u la ong ba kane ka kot ka dei ka jingpyrshang ban buh jingthoh ïa ka jingnoh synñiang jong u nongïalam saiñ hima sima ba kongsan bad ban pynneh pynsah ïa ka histori ba sdang jong ka Meghalaya na ka bynta ki pateng ban wan.
Haba batai ïa u (Late) BB Lyngdoh kum u nongïalam ba pawnam jong ka jingïakhih ban ïoh ïa ka Jylla, u nongthaw aiñ uba trei shitom, u bah Simons u la pynpaw ïa ka jingwanrah jong u ïa ka MLA Scheme bad ka jinglah jong u ban pynïaid ïa ki sorkar synrop ha ka por ba don ka jingeh ha ka saiñpyrthei.
U Bah Simons u la ïathuh ba kane ka kot ka la shim por kumba lai snem ban pyndep bad ka kynthup ïa ka jinglum lang bad pynbeit ryntih ïa ki jingkren jong u (Late) BBLyngdoh naduh u snem 1970 haduh u snem 2003, kynthup ïa kito kiba na ka por jong ka Provisional State Government.U la ai khublei ïa ka jingkyrshan jong ka khun jong u (Late) BB Lyngdoh, ka Kong Syrpailin Khonglah, ha kaba ai ïa ki jingkynmaw, ki tiar bad ki jingshemphang shimet.
Ka Kong Syrpailin Khonglah, ka khun jong u (Late) B. B. Lyngdoh, ka la pynkynmaw ïa ka jingangnud jong u kpa jong ka na ka bynta ka Jylla Meghalaya kaba la roi bad kaba khlaiñ ha ka liang ka ioh ka kot.Ka la ong ba ka phang pdeng ba ha khmat eh jong u kpa jong ka ka long “Ka Koit ka Khiah, ka Ioh ka kot bad ka Jingpule” bad ba u shim ba ka jingpyniasoh surok ka long kaba donkam bha na ka bynta ban pynbha ïa ka jinglah ban ioh ïa ka koit ka khiah, ka jingnang jingstad bad ki lad kamai.
Ka la pynkynmaw ba kum u myntri pla tyngka, ki jingmang surok ki dei ki mat ba kongsan tam jong u bad ba ha u snem 1980 u la tyrwa ban seng ïa ka jaka sumar kaba donkam ha ka ri ha ka rukom jong ka AIIMS na ka bynta ka thain shatei lammihngi. Ka la pynpaw ruh ba ha u snem 1990, u (Late) BB Lyngdoh u la long u Myntri Rangbah ba nyngkong eh ha ka ri ban wanrah ïa ka MLA Scheme.