Kum ki MDC ngi donkam ban don ka jingkitkhlieh ban ïada ïa ki riti dustur : T W Chyne

Shillong, K’ Lyngkot 18: U MDC ka Sohra bad uba long ruh u nongïalam ka Liang Ïatei ka KHADC u Bah Titosstarwell Chyne u la ong ba ka jingdonlang jong u ha kane ka jingïalang ka long namar ba u don ka jingkitkhlieh ban tei ïa ki riti dustur jong ka jaitbynriew.
“Ki don ruh ki ban ong ba kane kadei ka rynsan ïalap elekshon hynrei em ngi wan hangne da ka mynsiem jingkitkhlieh naba ïa ka jingmut jong ka kyntien MDC ka dei ruh ka jingmut korbar riti,” u la ong da kaba bynrap ruh ba ha kum kane ka samoi treikam kaba mynta la ïoh ban shna bun ki aiñ ban ïada riti dustur.
“Nga ai khublei ïa u Symbud Myntri Rangbah u Bah Prestone Tynsong uba la ïatreilang ban ai ki jingmynjur bad uba la shna ïa ka expert committee na ka bynta ban khmih bniah ïa ki Bill bad kumjuh ruh ban ai ki jingmynjur ïa kiba bun ki aiñ ba la shna da ka KHADC,” ong u Bah Chyne.
“Kane ka term kaba mynta kan sah ha ki khana pateng naba la lah ban ïoh ka jingmynjur ïa ka Land Bill ban ïada ïa ka khyndew ka shyiap bad dei ha u 2021 la ïoh ka jingmynjur na u Lat haba ïadei bad ka aiñ bat khyndew bad lyngba ka lineage act la ïoh ka jingithuh ïa ki kur bad kymjuh ruh halor ka aiñ pynkhuid pynsuba. Nga ai khublei ïa kane ka EC ba ka la wanrah ban pynkupbor ïa ki dorbar shnong, ki seng Samla bad ki seng Kynthei. To ngin wanrah jingïatylli ban pynneh ïa ki riti dustur, ki dorbar shnong bad kiwei kiwei,” ong u Bah Chyne.