Shillong, Jylliew 5 : U Myntri ka tnad DoNER u Jyotiraditya M Scindia ha ka Sngi Palei ula ong ba ka Ministry kala kylla long ka “nongpynbeit, nongpynïaid bad ka nong peit pyrman na ka bynta ka roi ka par jong ka thaiñ” da kaba treikam lyngba ki “Lai tylli ki C-Connect, Converge bad Catalyse kaba mut Pyniasoh, wanlam lang hajuh bae jingpynurlong”.
Haba kren ha ka jingïalang ba 73 jong ka NEC Plenary ba pynïaid da u Myntri kam Pohïing Amit Shah, u Scindia ula ïathuh ba phra tylli ki High-Level Task Force ki la aiti ïa ki roadmap ne lynti treikam ba ïadei bad ka jingtreikam, ka rep ka riang, ka kam jngohkai, ka kam ïalehkai bad ki lad pynïasoh.
“Ki Task Force…..la thaw ban pynkhreh ïa ka roadmap kaba bniah na ka bynta ka roi ka par hadien habud jong ka thaiñ Shatei Lam Mihngi bad ban pynlah ïa ka thaiñ ba kan synñiang shikatdei eh sha ka thong jong ka Viksit Bharat 2047” ula ong.
Ula bynrap ba “ïa ki jingai jingmut jong ki Task Force yn sa aiti sha u Chairman ka NEC ba un nang pyrkhat shuh shuh bad ban pyntreikam” bad ki “High Level Steering Committee ba kynthup ïa ki Myntri Rangbah ki Jylla bad ki Myntri Sorkar” ki la tyrwa ban peit thuh bha ïa ka jingpyntreikam ïa ki kam.
Halor ka jingbei tyngka, u Scindia ula ong “Ka jingpynlut hapoh ka Ministry of DoNER ka la kiew na ka 1000 klur tyngka ha u 2022-23 shaduh 4000 klur tyngka ha kine ki arsnem ba la leit, katba ka Ministry kala ïoh ïa ka bhah mang tyngka ba 6,500 klur tyngka na ka bynta une u snem mang tyngka”.
Haba pyntip ïa ki jingïohnong na ki jingbei pisa, ula ong “Ka Rising North East Investment Summit ka la wanrah ka jingkular ban bei tyngka ban seng kam ba kot kumba 4.5 lak klur tyngka”.
“Ka jingbei pisa ba shongdor kumba 40,000 klur tyngka lah dep ban pyntrei naduh ba pynlong ïa ka summit ha u bnai Jymmang 2025, kaba pyni ïa ka jingkiew ha ka jingsngew shaniah ki nongseng kam ïa ka thaiñ” ula bynrap.
Halor ka bank, u Scindia ula ong “131 tylli ki shnat bank ba thymmai la dep ban pynkha ha kylleng ka thaiñ Shatei Lam Mihngi ha kine ki 15 bnai ba la leit, katba 6,500 tylli ki shnong ki bym pat ju ïohi ïa ki bank, mynta la wanrah lang ïa ki hapoh ka banking network”.
“Ka jingpyntreikam ïa ka jingsiew digital ha ka thaiñ kala kot jan 90% lyngba ka UPI” ula ong.
Halor ki kam jngohkai, ula ong ba ki Circuit ba pawnam la trei ha kylleng ki 8 tylli ki Jylla “ban pyni ïa ka jingriewspah ka thaiñ ha ka jingdon ïa ka mariang kaba itynnad, ka pateng deiriti, ki jingthaw ba im bad ka lah ban kyntiew ïa ki kam jngohkai sha ki jaka bym pat ju poi briew”.
Ula ai nuksa ïa ka “Matabari Tourism Circuit ha Tripura bad ka Sohra Tourism Circuit ha Meghalaya” kum ki project kiba kongsan ban kyntiew ïa ka jingwan ïuhkjat ki nongshangkai bad ban aikam aijam.
Hapoh ka One State One Product initiative, ula ong “Ka Sorkar Pdeng ka la ithuh ïa ki mar ba pynmih na ki Jylla kum u shynrai Lakadong na Meghalaya, Muga Silk na Assam, Kiwi na Arunachal Pradesh, Queen Pineapple na Tripura bad ka Organic Farming na Sikkim”.
“Da kaba pyndonkam bha ïa ki jingkhlaiñ ba kham pher jong kawei pa kawei ka Jylla, kane ka sienjam kan ïarap ban pynïoh ïa ka jingithuh ka pyrthei ïa ki mar ba pynmih na ka thaiñ haba wanrah ïa ka roi ka par kaba kynthup lang ïa baroh bad kaba ïai neh” ula ong.
