Kular u Lat ban phah ïa ka dorkhas ki Bar Association sha ka sorkar ba dawa weng ïa u AG

Shillong, Nailar 30 : Ka High Court Bar Association bad Shillong Bar Association ha ka Sngi Saitjain ki la leit ïakynduh ïa u Lat ka Jylla u CH Vijayashankar ha Lok Bhavan bad aiti ïa ka dorkhast ban dawa weng kam noh ïa u Advocate General u Amit Kumar.
Haba ïakren bad ki nongthoh khubor hadien jong katei ka jingïalang, u Senior Advocate V K Jindal ula ong ba kane ka kynhun la ïalam da ka Executive Committee jong kitei ki artylli ki Association ryngkat bad ki nongïasaid aiñ kiba la rim ha ka kam.
Ula ong, ba ka jingshim ïa ka rai ban ïakynduh ïa u Lat ka dei hadien ba la ïohi ïa ki jingpynpaw jong u Myntri Rangbah ka Jylla ha ki rynsan social media.
“Hadien ka jingïohi ïa ka jingpynpaw u Myntri Rangbah ha ki Social Media ba ka jylla Meghalaya ka long kaba donbok ban don ïa u Amit Kumar kum u Advocate General, khlem da ai ïa ka lad ban sngap lem na ki dkhot jong ka High Court bad Shillong Bar Association, kumta ki la shim ïa ka Resolution ban leit ïakynduh ïa u Lat ka Jylla” ong u Jindal.
“Haba shimkhia ïa katei ka Resolution, ki dkhot jong ki Executive Committee bad ki nongïasaid aiñ kiba la rangbah ki la ïakynduh ïa u Lat ka Jylla ha ka por 10:30 mynstep ha Lok Bhavan ban aiti ïa ka dorkhast” ula ong.
Katkum ka jingong jong u Jindal, u Lat ka Jylla ula shah skhor bha ïa ka jingpynsngew jong kine ki kynhun.
“U Lat ula dap da ka jingnsgewtynnad ban pdiang ïa kane ka kynhun bad ula ai ïa ka hok kaba pura ban sngap bad shah shkor ïa ka jingpynpaw jong ki General Secretary ka High Court Bar Association bad Shillong Bar Association bad ki Nongïasaid aiñ kiba la rangbah” ula ong.
U Jindal ula ong, ba u Lat ula kdew ïa ka jingshah pyrkhing ïa ka riti treikam hynrei ula pynthikna ba ïa katei ka dorkhast un sa phah sha ka sorkar jylla.
“Hadien ka jingshah shkor, ula pynpaw ïa ka jingshah pyrkhing ïa ka riti treikam hynrei ula pynthikna ba ïa katei ka dorkhast un sa khmih bniah bad ban phah sha u Myntri Rangbah ka jylla bad ka jingkyrpad ban rah ïa kane ka mat sha ka jingïalang jong ka kynhun myntri bad ban leh ïa kaba donkam ban weng noh ïa u Amit Kumar kum u Advocate General bad ruh ban shna ïa ka SOP halor ka rukom thung ïa u Advocate General, kaba long ka kyrdan katkum ka riti synshar ka ri” ong u Jindal.
U Secretary General jongka High Court Bar Association u KC Gautam ula pynshai ba ka jingdawa ban wengkam kam dei satia kaba dang don hapdeng jong ka jingshah tian bishar kumba la pynpaw da u Myntri Rangbah ka Jylla.
“Kane ka mat ka dei halor ka jingdawa ka jong ngi ban weng kam noh ïa u Advocate General bad kane ka mat kam shim la don satia hapdeng ka jingshah tian bishar ha ka ïing Bishar ha kano kano ka rukom ruh. Kane ka kam kan shong eh ha ka jingbishar jong u Myntri Rangbah bad ka kynhun myntri ka jongu. La phah ïa ka Resolution sha u hynrei um shym la leh eiei halor kane” ong u Gautam.
“Ngi lah dap da ka jingkyndit ban iohsngew ba u Myntri Rangbah ula ong ba kane ka kam ka dei kaba dang don hapdeng ka jingshah tian bishar. Ka jingshisha ka long kaba shai kdar, kala mih ha ki social media bad ha ki lad pathai khubor ba palat ïa 1000 ngut ki nongïasaid aiñ kiba la don ha katei ka sngi ha ka rally ki la dawa ban weng noh ïa u Amit Kumar. Halor kino kino ki daw, ngi lah dep ban pynpaw sha ki lad pathai khubor kham hashwa, kam shym la don hapdeng ka jingshah tian bishar” ula ong.
“Kaei kaba dei ka bynta kaba don hapdeng ka jingshah tian bishar ka lah ïapher bak la bak, kam long kaba dei ïa u Myntri Rangbah ban ong ba kane ka kam ka don hapdeng ka jingshah tian bishar. Lehse u Myntri Rangbah um kwah ban pyni ïa ka nongrim kaba u ïeng ne um shym la ïoh ïa ka jingbatai kaba bniah bha” la bynrap u Gautam.
Ula ong, ba ka Bar Associations ka ïoh ïa ka jingkyrshan na baroh ki District Bar Association ha ka jylla.
“Kane ka mat ka long kaba sngewkhia bha. Ngi lah ïaid da ka Rally bad ngi don ïa ka jingkyrshan na man la ki Bar Association na baroh ki district” ong u Gautam.