Khliehriat, Naiwieng, 05: U Symbud Myntri Rangbah ka Jylla uba peit ruh ïa ka tnat PWD (Roads) Bah Prestone Tynsong u la kular ba u la kular ba pynïoh da ka surok babha ïa ka shnong Narwan, East Jaiñtia Hills District.
Ha kaba ïadei bad ka jingkyrpad ban shna ïa ka surok ha kane ka shnong, u Waheh Shnong jong ka shnong Narwan, u Ma Lamsuk Langstang u la aiti ïa ka dorkhas ha u Bah Prestone Tynsong uba la long kum u kongsan ha ka jingplie paidbah ïa ka Cla,rin 23 Resort ha ka shnong Narwan ha ka sngi Saitjaiñ.
U la ong ba ka Sorkar Meghalaya Democratic Alliance (MDA) ba la ïalam da ka National Peoples Party (NPP) ka la buh ïa ki mat kaba hakhmat eh naduh u snem 2018 haduh mynta ban wanrah ïa ka roi ka par bad kane ym dei shuh ha sor Shillong lane ha ki nongbah hynrei ka Sorkar kan sdang na nongkyndong bad ban wanrah ïa kane ka roi ka kiew ha ki shnong ki thaw.
“Kaba nyngkong eh ba ka Sorkar ka thmu ka long ba pynpoi surok sha ki shnong ki thaw bapher bapher,” u la bynrap.
“Lada ïoh ïa ka surok babha nga ïohi ba ka roi ka par ruh ka tuid stet bad halor kane ka dorkhas, nga kular ba ngan phah shna noh ïa ka mang tyngka na ka bynta ka surok ha ka shnong Narwan,” ula ong.
U la kyrpad ïa ka MLA jong ka Sutnga Saipung Constituency ka Kong Santa Mary Shylla ba kan bthah ïa u Engineer jong ka tnat PWD (Roads) Khliehriat ban shna noh wutwut ïa ka mang tyngka khnang ba kan pynsuk ïa ki nongjngohkai pyrthei kiba wan kai sha ka shnong Narwan.
Ka shnong Narwan ka dei ka shnong ha East Jaiñtia Hills kaba ju pynmih ïa u Soh Niamtra. Da ka jingdon jong ki surok kiba bha kan khring bha ïa ki nongwan jngohkai pyrthei bad kane kan kyntiew ruh ïa ka ïoh ka kot jong ki nongshong shnong.
U Waheh Shnong u la kyntu ïa u Symbud Myntri Rangbah ba shimkhia ha kaba ïadei bad ka surok ha ka shnong Narwan namarba lada don ka surok babha kan ïarap shibun ban kyntiew ïa ki paidbah jong ka shnong Narwan namarba ki paidbah ki dei kiba im da ka rep Soh ñiamtra kan ïarap shibun ha ka kit ka bah, kumjuh ruh ha shnong Narwan ki don ki kshaid, ki lum ki wah ba itynnad na kata ka daw donkam ban don ka surok ka babha.
U MLA barim jong ka Khliehriat Constituecy, u Ma Justine Dkhar, u la ai jingmut bad pynsngew ha u Symbud Myntri Rangbah lada ïoh da ka surok kaba thymmai kan kham biang ban shna surok noh na shnong Moopala ban poi sha shnong Narwan kaba jngai tang kumba 7 kilomitar bad kane kan ïarap ïa ki paidbah ka thaiñ ha ka leit ka wan, ha ka kit ka bah bad ha ka rah ka rong.
Ka Kong Santa Mary Shylla, ka la kyrpad ïa u Bah Prestone ba un ïarap lem ban pynïoh ki lad ki lynti ban shna surok ha ka shnong Narwan bad kumjuh ruh ha kiba bun ki shnong kiba hap hapoh ka Sutnga-Saipung Consituency kim don ïa ka surok ka babha bad ka buh jingeh bha ïa ki paidbah ha ka leit ka wan bad ka kit ka bah.
