Nongpoh, Rymphang 11: U Bah Paul Lyngdoh Myntri ka tnad jngohkai pyrthei ka jylla haka sngi saitjaiñ u leit ban iuhkjat sha u Lum Wortoh ba hap haka Raid Nongpoh ba dei ruh kawei naki jaka ba itynnad ban iohi kyndiang ïaka sor Nongpoh kaba dei ruh ka jaka kaba ka Elaka Nongpoh Sirdarship kala thmu ban pynlong ïaka lehñiam shad Sajer.
Ha katei ka jingleit peit bad khmih ïa katei ka jaka ban pynlong kum ka jaka jngohkai pyrthei la sakhi ruh da ka jingdonlang u Bah Mayral Born Syiem MLA ka Nongpoh, Bah Cyril Diengdoh Director ka tnad Tourism ka jylla, Bah Linus Lyngdoh, Lyngdoh ka Raid Nongpoh, ki longsan mansan bad kiwei kiwei ki riew rangbah.
Haba kren sha ki lad pathai khubor na ka liang u Bah Paul Lyngdoh u la ba tang lada peit ïaka jinglong jingman ka jaka la iohi ba u Lum Wortoh u dei ka jaka kaba itynnad bad kaba lah ban pynlong kum ka jaka jngohkai pyrthei, bad nalor utei u lum lah ruh ban iohi kyndiang ïaki shnong bapher bapher ka sor Nongpoh bad wat sha Shillong haka por ba shai bha ka suiñbneng.
U la ong ruh ba kum ka District Headquarter ka dang donkam shibun ka mang tyngka ban kyntiew ïaka kam jngohkai pyrthei namar kadei ka tnad kaba lah ban kiew sted bha bad kaba lah ban kyntiew ïaka iohkam iohjam bad ka ioh ka kot ki paidbah ha kaba hap ban wad bñiah bha ïa katei ka jaka ban jied ruh ïaki kam ba hakhmat eh ba lah ban wanrah ha katei ka jaka. Shuh shuh u la ong ruh ba kum ka tnad jngohkai kan ïatreilang ruh bad kiwei kiwei ki tnad sorkar naka bynta ban wanrah ki kam pynroi ha katei ka jaka bad ïa kaba mynta yn pynlong shuwa ka jingwad bñiah bad ban pyndep ïaki jingsorjamin ïa ka jaka ha kaba u la bthah ïa u Tourist Officer ban leh ïa kaba donkam bad khmih lynti shen yn sa ioh ban sdang ïaka kam.
