Kordit ki paidbah nongleit nongwan khamtam kiba shitom
Palat 2000 ïaid sahuh ki trok kit dewiong beaiñ ha thaiñ Maweit man ka sngi
(T.Tyrsa)
Nongstoiñ, K’lyngkot 30: Katba nang ïa hylla ha man ki rynsan ïalap election halor ki jingleh thombor jong ka Sorkar MDA ba la ïalam da ka NPP, ban trei bad ban kit beaiñ ïa u Dewiong, katta ka nang jur nang jur hapoh ka thaiñ Maweit. Hooid, watla ha ki saw bad san snem mynshuwa ym shym la sangeh satia ka jingtrei tuh ïa u Dewiong hapoh ka thaiñ, hynrei ym pat ju jia ka jingbun kali kumba long mynta ka tlang.
Ha kiwei ki tlang, lada bun eh ruh tang san ne hynriew spah tylli ki trok, mynta pat la shu dap mam ha shilynter kaba 35 kilometer, kata naduh Nongstoiñ haduh Maweit, ym duna ïa ka 2000 tylli shi sngi shi sngi bad ka surok ka la kylla powder lut, kat haduh ba ki nong Maweit kumba long mynta ki im ha ka jingsyllang bad kordit kaba jur.
Ki don ki trok kiba don number Plate don bun pat ruh ki bym don number satia. Imat baroh ki trok ka District jong ka jylla Meghalaya ki la ïa poi lut ha Maweit. Namar ba ha kiwei ki District kiba don Dewiong kim ïoh lad kumba ïoh ha thaiñ Maweit, namar ki paidbah ki dang sahdien bad bym nud kren pyrshah ne kren ïa ka hok lajong.
Ha kine ki sngi shuwa ban poi sha ka sngi thep Vote, la ïohi ïa ki jingïa ñiom kyrkieh ki trok khlem thiah miet bad sngi, ym tip sngi briew sngi Blei shuh. Ha ka sngi Republic day 26/01/23, la kham palat shuh shuh, kat haduh ba ki kali passenger ki la shitom ban ïaid namar la ima kum ban shah kyrjaw.
Ha katei ka sngi, la ïohi ba baroh ki ïa khang dukan la ha sor ne kyndong, kum ka dak ban burom ïa katei ka sngi 26 tarik. Hynrei, kito pat ki trok ba katto katto ki dei ki jongno ? La ki dei jong kita ki High Level, ba tur ïap tang ban ïoh bai lut Election ?.
Ka sur u paidbah mynta ka long satang ban kyrpad ïa kito ki Sengbhalang kiba trei hok ban ïada ïa ka lawei ka jaid bynriew na ki jingshah lute ei ha ki riew shim kabu, khamtam eh ki paidbah ka thaiñ Maweit ruh ki dei ki Khasi paradoh parasnam jong phi, ba kin pyni mynta ka kynti da ka kam.
Ha shuwa ban pynmih ïa kane ka khubor, la hap ban ïa sngewthuh jingmut bad ki katto katne ki riew Rangbah jong ka thaiñ bad ki samla pule kiba la kham shemphang, lym kumta kan long ka jingma ïa uno uno u ba pynwit ïa ki. Namar lehse don kti lang bad ki bor pynïaid District. Ngi hap ban kren, namar mano ba la bthah ïa ki trok kit dewiong ban nym ïaid mynsngi ha Nongstoiñ, katba ïa ki paidbah Nongmaweit kim lehraiñ satia, niom la ka ñiom.
Kum kitei ki jingjia, ka sorkar kan ïai kam ba kit ïa u Dewiong Old stock (Auction), kumba long mynshuwa ba la shu thaw la ka thaw ba la pynïaid Challan ha ka kyrteng u Dominic Myrthong, u Highest Bidder, u para trai jong u MLA Mawshynrut Constituency. Mynta ruh la bna ba dang don shuh u ta u stock ha Maweit, Pyndengshahlang, Riangmaw, Langmar bad kiwei kiwei ki jaka. Kum ki trai shnong ngi tip haei ki don kum kita ?. Ka dei tang ka jingthok ka sorkar NPP tang ban ïoh trei tuh ïa u Dewiong ha ka jylla.