Hiar u nongïalam ka VPP sha ki lai tylli ki jaka

Mawkyrwat, K’lyngkot 30: U President ba Rangbah jong ka Voice of The Peoples’ Party (VPP), u bah Ardent Miller Basaïawmoit, ha ka sngi saitjaiñ jong ka taïew u la hiar sha ki lai tylli ki shnong kiba hap hapoh ka Ranikor Constituency ryngkat ki jingpynshai paidbah ïa ka nongrim jong ka seng bad ban pan ruh ïa ka jingkyrshan na ka bynta u bah Overlin Imïong uwei na ki kyrtong jong ka VPP napoh ka Ranikor Constituency.
Lah ban kdew ba ki lai tylli ki shnong ki kynthup ïa ka shnong Nongnah, Ngunraw bad Rangthong kiba dei hapoh jong ka South West Khasi Hills District.
Haba kren ha ki jingïalang, u bah Ardent Miller Basaiawmoit, u la ong ba ka jingwan jong ki mynta ka sngi ban pynlong ïa kine ki jingïalang ki long ban pynshai ha ki paidbah ïa ki nongrim kiba skhem jong ka VPP bad kumjuh ruh kumno ban wanrah ki jingkylla ha kane ka elekshon. Haba phai ha kawei pat ka liang u la ong ba bun ki samla ieid jaidbynriew mynta ki por ki shu pynleh noh ei kai ïa ka por tang haba ïa khih bad teng teng ki poi jied ïa ki kam leh noh ruh bad ka daw ka long namar ba ym don ïa ki ain kiba khlaiñ bad ki nongïalam kiba ïohi jngai kiba lah ban wanrah ïa ki aiñ ki ban ai mynsiem ban ai jingshngaiñ ban ïoh ïa ka shongsuk shongsaiñ khnang ba ki khun samla kin ïoh ban pynleit jingmut ha ka kam ka jam ka pule dangle bad ka trei ka ktah.
U la ong ruh ba ka jingseng jong u ïa ka VPP ka long ban peit thuh ïa ka 30 ne 40 snem ka ban sa wan namar kum ki nongïalam ki don ïa ka jingïohi jngai bad kata ka jingïohi jngai jong ki ka long ban pynim ban pynbha bad ban pynkylla dur ïa ka ri, bad ka jaidbynriew ryngkat ki nongrim ban wanrah de ïa ka synshar khadar kaba khuid kaba suba.
Katba ha ka jingkren jong u kyrtong ka VPP na ka Ranikor Constituency, u bah Overlin Imiong u la kyntu ruh ïa ki paidbah ba kim dei shuh ïalam bakla ha kaba ïa dei bad ka jingjied ïa ki nongmihkhmat kumba la jia ha ki snem ba la dep namar ka jingpynjop elekshon ïa ki kyrtong hapoh jong ka Ranikor Constituency ka dei da ka bor jong ka pisa. “Nga te ngan ïaleh ïa kane ka elekshon da ka jingkhuid bad ngam kwah ban thied ïa ka vote namar kan nym wanrah ïa ka jingkylla ha ka konstitwensi”, ong u bah Imïong.
Namarkata, u la pynpaw ba kum u samla u ba ju ïa trei ha ka imlang sahlang naduh ba u ïohi ïa kane ka party VPP, u la kwah ban pynïasaoh bad kane bad ong ruh ba dei sa tang kane ka party kaba don ïa ka jingkyrmen ïa ka jylla bad ïa ka lawei ki khun ki kti hapoh ki konstitwensi ne wat hapoh jong ka Meghalaya.